Schwatzer Freidaag!

Guder Daag Blog Leser! Ich hoff ass dei Danksfescht gut gange iss un ass du viel gudes Esse gesse hoscht. Awwer, es Fescht iss nau vorbei un en annere Feierdaag iss nau am geh do in Amerikaa. Verhafdich, iss der Feierdaag ee paar Daage, un sie hen alles mit Eikaafe zu duh. Du weesscht was ich meehn…”Schwatzer Freidaag”.

Ya, der Freidaag nooch Danksfescht iss der so genaamte “Schwatzer Freidaag”. Frieher hen all die grosse Sales aerscht nooch Middenacht aagfange, awwer in die letschte paar Yaahre hen sie schunn am Danksfeschtowed aagfange. Sell find ich net so gut. Es Esse iss noch net recht in unsere Bauch gsetzt un die Leit sin schunn in ihre Maschiene un uff zum Schtors gange! Ya, die Familyezeit iss net so wichdig fer manniche Leit. Glicklicherweis, iss es bei mir allsfatt noch wichdig. Nooch es Esse miss mei Familye Kaarde schpiele un vielleicht ee paar Biere luschdere! Awwer wie ich frieher gsaat hab, fer viel Amerikaaner, ab 6 Uhr iss es Zeit Geld auszugewwe!

Ich find sell so dumm. Wer iss schuldig? Well, die Eikaafer fer schurr, awwer aa die Schtors. Sie mache die Diere schunn frieh uff un all ihr Schaffleit misse dann ihre Danksfescht un Zeit mit ihre Familye aa rausschmeise….un fer was? So epper $50 uff en Guckbax schpaare kann. Ich hab genunk Videos gsehne, die Leit die uff “Schwatzer Freidaag” eikaafe gehne sin vollschder verrickt un naarisch. Mannichmol gebt es Fechte in die Barkbletz odder aa in die Schtors! Ya, Leit waerre annere Leit schlagge iwwer en gude Deal uff en Crockpot odder en neie Videoschpiel fer ihre Kinner! Aye aye aye. So dumm kenne mir sei.

Frieher waar es yuscht ee Daag: Schwatzer Freidaag. Awwer heitzudaage iss es es ganze Wochend un der naegschde Munndaag aa! Nadierlich hemmer abaddiche Naame fer yede Daag: “Small Business Saturday” un “Cyber Monday”. Small Business Saturday find ich arrig gut. Uff sellem Daag solle mir yuscht bei Small Buisnesses eikaafe. Du weesscht was ich meehn: was mir frieher “Mom un Pop Schtors” gheesse hen. Freidaag gehne all die Leit zu de grosse Schtors wie Best Buy, Target, un Walmart. Awwer Samschdaag find ich besser. Ich kann in en gleene Schtor geh un mit dem Besitzer schwetze. Ich vorzieg mei Geld in so en Schtor zu schpende. Ich weess wu mei Geld geht! Zum Glick iss Sunndaag noch glee bissel ruhig, awwer dann kummt “Cyber Munndaag”. Dann gehne all die Leit uff em Internet fer grosse Deals zu griege. Sites wie Amazon un die annere grosse Schtors hen gudi Gelegeheide dei Geld auszugewwe. Un du kannscht es alles vun dei Kich duhe. Aye yummer, du musscht net dei Hosse aaduh!

Nochdem CNN, Amerikaaner hen $5 Billyon geschder uff “Schwatzer Freidaag” gschpendt. Sell waar 16% meh ass letschdes Yaahr. Ya, oft hemmer Geld zu schpende, awwer wie kennde mir unser Geld besser schpende? $5 Billyon Dollar kenne viel Gudes in re Welt duhe…gell?

Ich kann ehrlich saage ass ich hab nix geschder gkaaft. Ich waart uff der Belsnickel. Mol sehne was er mir bringt.

Do iss en Audio Klip:

3 thoughts on “Schwatzer Freidaag!

  1. Very nice. Wish you could post a translation side by side. It’s fun to pull out my dictionary but, it does take awhile. 😃

  2. Frank Pfaff 24/11/2018 — 12:22

    “Belsnickel” han isch net mitgriescht.

  3. Der Belsnickel iss unser Weihnachtsmann. Kummt vun Pelznikel aus re Palz.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close