Guder Daag Blog Leser. Des Woch waar en lange Woch fer mich, glee bissel Schtress an die Arewet un viel Schtress in unsrem Land wege die Leckschion. So fer en Detox, hawwich mich hieghockt un en Gedicht gschriwwe. Viel Gschpass bei lese!
Der elfte Munet
Oktower geht un November kummt,
die Bledder sin widder rot.
Mir henn die Uhre zerickgedreht un
unsere Gaarde sin nau dot.
Kiehle Mariye sin do,
die Sunn geht frieher ins Bett.
Die Yaeger gehne in der Busch un
die Welschhinkel sin reddi un fett.
Fer zwee Munet hemmer viel gheert,
‘sis ya die Zeit widder zu schtimm’.
Schtories un Liege links un rechts,
wie waerrd die Zukunft? Ich hoff net schlimm.
Mit Reck un Swedders laafe viel Leit drauss,
un die Luft iss net meh heiss.
Schwatze un braune Rauwe,
brophezeie der Winder waerr weiss.
Do iss en Audio Klip:
PA Dutch 101 
Hi Doug. Bin g’schpannt zu wisse, wie selle schwatze un braune Rauwe odder Woolly Bears uff PADeitsch g’heesse.
Jack, ich weess net eb es en Naame fer sie gebt. Mei Familye hen allsfatt Woolly Bears gsaat! Es muss en Naame gewwe, awwer ich weess es net!
Ich wees net. Der Nowember is der elft Munet. Sis net der neite Munet ???
Ya, du hoscht Recht. In Latein November waar der neinte Munet, un ich had des gschriwwe mitaus zu denke. Mannichmol mach ich aa Fehler. Ich hab es gefixt. Gross Dank! Ich glaab mei Kaffi waar net schtarrick genunk heit!
All recht. Danki.