Guder Daag Blog Leser! Esse, wie wichdig iss Esse zu en Kuldur? Ich weess schunn, arrig wichdig. Fer uns Deitsche iss deitsche Esse en grosse Schtick vun uns. Denk mol draa, Pannhaas, Pissebett, Fastnachts, Saumaage, Sauergraut, Filse, Buweschenkel, Melassichriwwelboi, un Lattwarick un Schmierkaes. Fer mich muss Welschkannboi aa uff re Lischt sei. Ich bin uff en Bauerei uffgewaxsne un mir hen allsfatt darrich der Summer frische Welschkann ghatt. Mei Mudder hot so gegliche Welschkannbois zu mache un aa zu esse. Oft im Summer hot es en Welschkannboi zum Owedesse gewwe. Waar es aa so fer eich?
Welschkannboi braucht net so viel Ingredients un es nemmt net lang zu rischde un aa net lang zu backe. Heit will ich der Reseet mei Familye mit eich mitdeele.
Ingredients:
3-4 weich gekochde Grummbiere – 2 Kuppche Welschkann – 1/4 Kuppche Millich – Boideeg – 2 gekochdes Oier – 3 Essleffel Budder (in 3 Schticke abgedeelt)
Was du duhne musscht:
In en Boideeg, schtell die Grummbiere (in gleene Vierecke gschnitte). Duh dei Welschkann dann drin (uff de Grummbiere). Schneid die Oier blettlich un leg sie uff die Welschkann. Geb die Millich aa drin. Schtell der Budder uff die Oier. Geb glee bissel Sals un Peffer dezu. Duh der Boideckel druff un schtech es mit en Gawwel. Back fer ee Schtunn bei 350 Graad odder bis es gold-braun iss.
Do sin ee paar Pickders vun dem letschde Welschkannboi der ich gemacht hab:
Do iss en Audio Klip:
PA Dutch 101 