Guder Daag Blog Leser! Mannichmol iss es die gleene Dinge im Lewe die die bescht sin, gell? Mir saage sell oft in Englisch un heit hawwich druff gedenkt. Was iss mei Lischt vun de gleene Dinge in Lewe die die bescht sin? Well fer des Poscht will ich eich mei Lischt gewwe. All zu oft vergesse mir wie gut die gleene Dinge sin. Vielleicht denke mir all zu oft an die grosse Dinge in Lewe. Ya, die grosse Dinge sin wichdig sell iss fer schurr, awwer mir kenne viel Freed vun de alldaagsiche Dinge griege. Die Dinge uff des Lischt iss was mir Freed in Lewe bringe:
1. Mei Toast in dem Dopper vun en frisches gebrodes Oi zu dunke.
2. En heisses Kuppche Kaffi.
3. En neies Paar Socke.
4. Wann mer nooch en langer Daag hiehockt.
5. En kiehles Koppekisse uff en warem Summerowed.
6. Der Geruch nooch en Summer Regge.
7. Pingschtblumme im Friehyaahr.
8. Wie die Karrich mit all de Kerze uff dem Grischtowed ausseht.
9. Wann mer en Lied singt, es mer arrig viel gleicht.
10. En Umarming vun en guder Freind.
11. En Campfeier uff en Summerowed.
12. Laafe wann es schneet.
13. En Feierflieg fange.
14. Es Gfiehl wann du der letschde Schtengel aus dem Gaarde rausgeroppt hoscht.
Un…..
Wann mer Deitsch schwetzt odder heert.
So datt iss mei Lischt. Was schteht uff eier Lischt? Loss mich mol wisse mit en Comment!
Do iss en Audio Klip:
PA Dutch 101 
1. Mei Hinkle, wann sie mariyets zu mir laafe kumme, a bissle Welschkann fier zu griege.
2. Die scheeni Schmetterlinge, die mein’n Blumengaarde b’suche.
3. Die erschde Blumen im Friehyaahr
4. Kleeni Hinkel- un Entenkucken
5. Een guder Iems
6. Die Kaulquapp’n un Goldfische im Wasserloch vor insrer Karrich
7. Im Friehyaahr, wann die neie Bledder fange an zu waachse
8. Een Spaziergang zu maache
9. Wie du, Deitsch zu schwetze un zu heere
10. Wie du, die Feierfliege owets zu gucke
1. En scheener Haerbschtdaag, wu die Bledder gehl un rot sin un die Luft ganz frisch iss.
2. Wenn es dunnert leis in der Nacht un dann heert mer die Reggedroppe aafange.
3. Kaffi-drinke mit Freinde.