Guder Daag Blog Leser! Die Welt iss graad in re Mitt vun en grosses Fescht, awwer do in Amerikaa feiert fascht niemand. Was iss es? Aye, es Welt Koppche! Ya, die grosse Soccer (Fuusballe) Tournament iss nau am laafe. Es Welt Koppche findt alle vier Yaahre schtatt. Des Yaahr iss es in Russland. Vielleicht feiere die Amerikaaner net so viel weil unsre Mannschaft net gequalified hot! Ya, mir hen gemisst heem zu bleiwe. Ich glaab aa weil Soccer net so beliebt do iss, wie es in annere Deel vun re Welt iss. Soccer gucke in annere Lenner kann wie en Grankheit sei! Die Leit greische un feiere wie Moondkelwer!
Alle vier Yaahre kumme Mannschafte aus 32 Lenner zamme um fer es Welt Koppche zu schpiele. Die sin in Druppe gsammelt un dann schpiele yede Mannschaft drei Druppe-Schpiele. Die zwee beschde Mannschafte kumme vun yede Drupp raus. Dann misse sie in en “Winner Take All” Tournament schpiele.
Ich bin en grosse Soccer Fan, un weil ich in Deitschland gewuhnt hab, bin ich en grosse Fan fer die schwatz, rot, un gold! Deitschland hot es letschde Welt Koppche im 2014 gewunne, un sie sin widder en grosse Pick um es widder zu gewinne. Awwer, net so schtarrick, es gebt viel annere gude Mannschafte wie Mexiko, Croatia, Brazil, un nadierlich England un Frankreich.
Viele PA Deitsche Voreldere sin aus re Schweiz kumme, un des Yaahr iss die Schweize Mannschaft dabei! So vielleicht kannscht du fer sie greische? Awwer die grosse Iwwerrasching des Yaahr iss gleene Iceland! Ya, sie sin aa in die Tournament, un hot schunn en Schpiel gewunne! So en gleenes Land, awwer so en grosse Drupp vun Unnerschtitzer! Die gleene Viking Army hot Russland eigefalle! Eb yedes Schpiel duhne sie die “Viking Blatsch” un ich muss ehrlich saage ‘sis arrig eischrecklich! Mir misse sehne wie weit sie in re Tournament gehne kenne! Ich hoff ganz weit!
Die grosse Championship Schpiel waerrd uff em 15. Tschulei in Moskow sei. Ich waerrd nadierlich dabei (well, net in Moskow, awwer uff mei Sofa). Wer waerrd gewinne? Was denkt dihr? Wen unnerschtizt dihr?
Do iss en Audio Klip:
PA Dutch 101 