Des Sunndaag iss en wichdige Feierdaag fer uns do in Amerikaa…der Mudderdaag. Fer was hen mir selle Feierdaag? Ich glaab ass selle Frooge ganz leicht zu antwadde iss. Die Mudder hot een Daag in Yaahr fer sie weil die annere 364 Daage Arewetdaage fer sie sin! Ich kann ganz sicher saage ass es niemand gebt die so wichdig iss ass dei Mudder….gell?
Yuscht denk mol aa was sie alles fer dich gemacht hot! Sie hot dich fer nein Munet lang in ihre Bauch gedraage. Dann hot sie viel Schmatze ghatt um dich in re Welt zu bringe. Dann hot sie die naegschde 18 Yaahre ihre Lewe fer dich gebt….fellig. Sie hot fer dich gekocht, dei Gleeder gwesche, sie hot dich iwwer all gfaahre um Dinge zu duh. Hot sie eenichmol geglaagt? Mei net…well vielleicht glee bissel.
Mudderdaag is nau hatt fer mich. Ich hab mei Mudder in Auguscht 2006 verlore. Sie hot Grebs in ihre Draagsack ghatt. Sie waar fer bloss drei Munet grank bis sie gschtarewe iss. Es macht mich allsfaat bedauerlich wann der Mudderdaag widder rumkumme. Awwer nau bin ich en Daadi un ich seh ass was en Mudder mache muss, des Mol vun re annere Seit. Mei Fraa iss en wunnerbaar Mudder zu unsere Kinner. ‘Sis net leicht en Mudder zu sei, sell iss fer schurr.
Ich hoff ass alle vun eich eppes schee fer eiere Mudder am Sunndaag duht! Nemm sie zu en Essblatz odder koch sie eppes, kaaf sie scheene Blumme, odder en gudes Gschenk. Un mach fer schurr ass du sie en grosse Boss gebscht un ass du aa “Ich lieb dich!” saagscht!
Hallicher Mudderdaag an all die Midder die mei Blog lese!
Do iss en Audio Klip:
PA Dutch 101 
Amen !! Nothing can ever replace a mother’s love.