Guder Daag Blog Leser! Fer uns Deitsche iss die liewe Grundsau unser Wedder Brophet. Awwer es gebt viel annere Schprich iwwer es Wedder odder wie es Wedder sei waerd. So do sin ee paar die ich gfunne hab:
Wann die Schpinne Neschder uff es Graas baue, gebt’s Regge.
Wann die Gens uffriehrisch sin, gebt’s Schtaerm.
Wann die wilde Gens hochfliege, waert’s waarem; nidder, kalt.
Gewiddre im Schpotyaahr, waarem; Im Friehyaahr, kalt.
Wann die Bledder aerscht vum Gippel vun de Beem falle, gebt’s en leichder Winder; falle sie aerscht newwe rum, gebt’s en hadder Winder.
Wammer Bisskatz im Winder riecht, gebt’s gelind Wedder.
Datt sin yuscht ee paar Weisheite aus unsere Kuldur un Schprooch. Wie Waahr sin sie? Ich weess net, awwer so glaawe mir. Hey, die Professional Wedder Forecasters sin net allsfatt recht aa net!
Wisst dihr annere Weisheite? Wann ya, loss mich mol en Comment mit ihne!
Do iss en Audioklip:
PA Dutch 101 
Ich weess ene annere, Doug. Kennscht du selle grosse schwatze haarige Raup’n mit’m roten Band in da Mitte? Sie g’heesse Wollbaeren uff Hochdeisch un wooly bears uff Englisch un sie sinn aa in Pennsilfania daheem. Farleicht kannschte mir den PADeitsch Naam saage? Ennihau, wenn’s rote Band dick iss, giwwt’s en hadder Winder, awwer wenn’s Band dinn iss, dann giwwt’s gelind Winderwedder.
Jack, ya, sell kenn ich gut!