Grundsau Lodge Zeit!

Guder Daag Blog Leser! ‘Sis schpot Yenner….Hanning kummt. Dihr wisst was sell meehnt: Grundsau Daag kummt gschwindt. Fer uns Deitsche iss Grundsau Daag wie en heilige Daag. Verschiddliche Grundsei kumme aus ihre Lecher un brophezeie iwwer es Wedder fer de naegschde sex Woch. Bleibt Winder lenger, odder kummt es Friehyaah frieh? Die Grundsau saagt uns.

Mir kenne aa net vergesse es annere grosse Ding, es kummt: die Grundsau Lodges ihre Versammlinge! Ya, ass viel vun eich schunn wisst, es gebt 16 Grundsau Lodges nooch in Pennsylvaania-Deitschland. Un alle Yaahr kumme die verschiddliche Lodges zamme un hen ihre eegne Versammling. Awwer wie weescht mer wann alles iss? Frieher hot mer gemisst en Mitglied vun en Lodge zu sei um vielleicht en Newsletter zu griege mit all die wichdige Information. Awwer es iss nau 2018, un mir hen die Internet. Der Peter Zacharias, en guder yunger Deitscher, der arrig gscheit mit Computers iss, hot en neie Website gemacht: http://groundhoglodge.org/

Do kannscht du Information fer all die Grundsau Lodges finne. Gross Dank fer sell Peter! Wann du en Grundsau Lodge bsuche witt, click mol uff die Link um meh zu wisse.

Un wann du net in unsere Gegend wuhnscht, un witt eppes vun de Grundsau Lodges lanne, do iss en arrig gudes Buch iwwer die Topic: Serious Nonsense: Groundhog Lodges, Versammlinge, and Pennsylvania German heritage.