Die Nacht eb Grischtdaag!

Guder Daag Blog Leser! Well, ‘sis es Woch eb Grischtdaag un ich hab eppes abbadich fer eich. Eb ee paar Woch hawwich des Gschicht in die Mail grickt. Der Dale Moyer vun der Pennsylvania Dutch Heritage Group aus Yarrick Kaunty hot es in ihr Diesember Brief gedruckt. Ich hab es arrig gut gefunne so ich will es mit eich mitdeele.  Die Nacht eb Grischtdaag iss so en gut bekannte Gschicht, awwer des Version iss glee bissel anners. Viel Gschpass bei Lese!

Die Nacht eb Grischtdaag

Es waar die Nacht eb Grischtdaag un darrich’s ganz Haus nix waar am zawwle, net evens en Maus. Dann heer ich epper greische, in re Schprooch so verschtickt. Der Santa waar gschtucke im Schannschtee, er henkt datt un kickt. Ich greif ihm beim Bee, der dicke alde Glotz. Nau losst alles geh, er kummt runner ass er blotzt. Er landt uff seim Hinnerdeel, noh waar en lauter Grach. Des hot mich gelechert, awwer zu ihm waar’s ken Gschpass. Die Schtupp  waar schtaawich, nooch Sulfer geroche. Sei Gsicht waar so rot ass Feier im Offe. Er schteht langsam uff, un bascht sich mol ab. Er hot ghuusscht un gniesst un in em Gringel rumm gedappt. Sei Brille waare verbroche, sie hen ghonke von’s eent Ohr. Sei schtripper Hut waar seidwaerts uff verschtruwwelde weisse Haar. Sie langer weiser Baart waar schwatzer Schtaab mit Russ. Er waar en dreckicher alder Mann vom Kopp zu seim Fuss. Er peift fer sei Hasch, die waare nimmi uff em Dach. Sie waare abgschprunge seller kalt Winters Nacht.  Noh greischt epper laut, er verschprenkt ball die Lunge. “Dabber kumm! En Drupp Hasch hen die Gremmem umgschprunge.” Selli ald Meedel iss sei Lewes nimmi’s same. Der Santa iss ins same Schaep. Gschwischich die zwee alles dut weh. Sie hot Haschschpure uff ihrem Buckel, sei Hinnerdeel hot’s Fareb wie’m Offerohr, gschwischich all sellem Yammere un Yammere iss es en schwatz un bloh Grsichtdaag des Yaahr.

Well, nau sell waar doch eppes, gell? Ich hoff ass dei Grischtdaag besser geht ass in re Gschicht!

Do iss en Audio Klip: 

 

1 thought on “Die Nacht eb Grischtdaag!

  1. Jack Speese 23/12/2017 — 09:08

    Ich gleiche selle luschdige G’schicht, Doug. A bissl wie Granma got run over by a reindeer, gell? Un ich hawwe amol selwwert ne luschdige Grischtdaagkarte g’grickt, wu der Santa im Bild im Schannstee g’schtucke waar! Dei Grischtdaag un NeiYahr Video hawwich g’rade aa’guckt un g’heert un es hot mich arrig gud g’falle.
    Een hallicher g’segneter Grischtdaag winsch ich dir un deinre Family!
    Jack

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close