Guder Daag Blog Leser! Des Woch hot mei Fraa Bicher zu unsere Kinner gelese….wie gewehnt. Mir lese yede Owed Bicher zu unsere Kinner. Ich waar in die Kich un ich hab mei Fraa gheert…es waar Mammi Gans Gedichte. Ich hab graad gedenkt, ich sett mol ee paar uff Deitsch fer mei Blog iwwersetze. Dann hawwich errinert ass epper, der en arrig bessere Schreiwer waar, hot es schunn geduh: der John Birmelin. So des Woch will ich eich ee paar vun dem John sei Iwwersetzing gewwe.
Hei, diddel, diddel.
Hei, diddel, diddel – Die Katz mit de Fiddel – Die Kuh schpringt iwwer der Muun. – Es Hundelche lacht – Un weddelt un blafft; – Die Schissel un Leffel – Die schpringe um’s Effel – Wie ewwe so Schussliche duhn.
Georgie, Porgie, Blaume Boi.
Georgie, Porgie, Blaume Boi, – Bosst die Maed, en ganzi Roi, – Wann sie awwer heile dann, – Ya, do schpringt er was er kann.
Pitter, Pitter, Karbsefresser.
Pitter, Pitter, Karbsefresser, – Hot en Fraa, die weess net besser, – Halt sie in ‘re Karbseschaal, – Gleicht sie datt noch ‘s bescht vun all.
Pitter, Pitter, Karbsefresser, – Meent er gleicht en annri Besser. – Pitter, sell iss gar net schee, – Musscht zu deinre erschte geh!
Pitter, Pitter, Karbsefresser, – Gleicht en annri doch net besser; – Lannt er Lese, lannt er Schreiwe, – Will er bei de Erschte bleiwe.
En aldi Grossmammi die wuhnt imme Schuh
En aldi Grossmammi die wuhnt imme Schuh – Sie hot so viel Kinner un Druwwel dezu; – Sie gebt ‘ne zu esse, doch yo net zu fett, – Sie garbt sie gedichtich un yaagt sie ins Bett.
Yankee Doodle
Yankee Doodle kummt emol – Geritte uff ‘me Pony, – Schteckt en Fedder in der Hut, – Un saagt ‘s waer Macaroni.
Do iss en Audio Klip:
PA Dutch 101 
Ich muss danke saage fer al dei schreiwerei! Net yusht’s fer lese, awer aa por annera Dinga lese, und gwehnlich eppes uff guka!
Hallo liewwer Doug!
Danke nomols für Dei Noochricht un selle gleene Kinnerreime vun d’r gute Mami Gans! E scheene Üwerraschung, un mei haww i lache müsse😊 I kenn eenige Sächele vun J. Birmelin; do hosch du recht, d’r hot viel gutes g’leischtet. Du awwer erscht recht, Du bischt au sehr talentiert. Hosch v’leicht eppes vun Max un Moritz? Die senn au recht luschdig, gell? I hoff, Eich gaht es nur beschtens, un i wünsch Eich viele solche g’mütliche Owede im Familiekreis–uff sellre Weis duht ma sich schöne Erinnerunge wie die Edelsteinele sammle, gell?
Mit beschde Frühjohrgrüsse ais Pittsburgh vun drowe uffm Berg Mt. Washington,
Dei
Jim (Jakob) Kramer
Des is’ awwe gut! Ich kann setze die ganze daag leese un’ harriche zu des.