Guder Daag Blog Leser! Well, des Woch kumm ich widder mit en Gascht Schtick! Des Mol kummt es vun dem Eric McClain. Gross Dank fer dei Schreiwes!
Mei Familia iss vun Deitschland noch Russland ausgewannert un hun an der Volga gelebt. Un dann sin sie weider noch Amerika gefohra un hun in Kansas gesiedelt (circa 1890). Die worra Lutherische un worra hartschaffiga Leit. Der Dialekt, wu mir hun geschwetzt, iss net so onnerschda vun dei PA Deitsch, avver hot aa paar komischa Worda: Strummbeera (strawberries), Gevetchga (vegetables), Woes (aunt), Vedder (uncle, not cousin), Geschwisterkind (cousin), usw. (I learned High German in school and only heard this dialect, so I’m trying to spell it as I remember it. Our original forefather came from Kleingartach, a little town near Stuttgart in Baden-Wuerttemberg.)
Die Weibsleit konnda orrig gut kocha! Die Rezepta, wu ich hun geglicha, worra Grautbierocks (cabbage rolls), Dinnakucha (“thin” coffee cake mit Schlecksel [watermelon syrup] un Rivvel [streusel] druff) un Peffernuss Brot (spiced bread with watermelon syrup and anise flavoring). Mei Verwandta worra guda, fromma Leit un konnda guda Geschichta vezaehla. Ich bin stoltz, en Daal vun ihna zu sei. Do is en aldes Gedicht vun meinre Kindhaat:
Du bischt net schee, du bischt net schee,
Du hoscht kei rota Backa meh –
Rota Backa, weissa Zaeh,
O, du lieva Zeit, wie schee!
PA Dutch 101 
Hallo, liewwer Doug un Liewwer Eric! Wie schee, eppes uewer die Russlanddeitsche zu leze! Als i vor viele Johre Organischt an d’r Sankt Matthaeus Ev. Luth. Kirche in Pittsburgh g’wae bin, senn zwee liewwe Leit zu uns kumme: Herr Adolf Weinschroeder un Frau Rosalie Schuhmacher. Se senn beide Russlanddeitsche g’wae. Frau Schuhmacher haww i besser g’kannt. Se hot e schweres Lewe g’hot: wie d’r Zweete Weltkrieg ausg’broche hot, senn alle Leit ausser ihr un wenig annere mit schier gornix vun ihrem Hab un Gut aus Kasachstan nooch Siberien v’rschleppt worre. Frau Schuhmacher isch mit drei gleene Kinnerle uewer ‘n Fluss g’schwomme un nooch Stuegert [so duht ma Stuttgart uff Schwobdeitsch nenne) ei’g’wandert. D’r Hitler isch a’ d’r Macht g’wae, un d’r Judehass un Auslaend’rhass senn schier unertraeglich g’wae, also senn se nooch Amerika g’kumme. Herr Schuhmacher isch vun d’r Regierung Johre zuvor in Haft g’nomme worre un total v’rschwunne. E traurigs Schicksal gell? Awwer Frau Schumacher hot schwer g’schafft wie’s Deitsche hiwwe un driwwe mache, un fuer die Familie hot se e guts Lewe v’rschafft. Se gilt fuer mi als Heldin un isch mi e wohrer Segen vum Herrn Gott g’wae. Liewwer Doug, Du schaffscht au ganz schwer un bischt wirkli e gutes Vorbild vun dene gute geitsche Werte: liewwe zur Familie, zur Heemet, zum Herrn Gott un zu allem, was schee un wertvoll im Lewe isch. I glaub daes bischt du au, Eric, un i wuensch eich ,,vun allem, was gut isch, nur daes Allerbeschte.”
Beschte Gruesse
Eier Jim (Jakob) Kramer
Seller Pittsburgher Kerl
Naach so viele interessante Schtories vun Familien un Weltg’schichte hawwich erscht bezweifelt, ob ich iewwer mei Hinkele schrweiwwe sett. Awwer nachhert hawwich g’dacht, warum nit? As PADeitscher iss die Landwirtschaft in inser Blut, gell? Mein ganzes Lewwe lang hawwich Hinkele g’hatt. Letschdes Yaahr war ‘ne Ausnahme, weil mer uns wegge allsfatt heeher steigende Steier un Kranknkassebeitreeg umg’zoge henn miesse. Also hawwich mei liewwe Hinkele verkaafe miesse. Mit Gottes Hilfe jedoch henn aa die schlechte Zeite ins Lewwe ihre positive Seite. Ich haww in Maerz 16 neie kleeni Hinkele griegt. Nau sinn sie een Munaat alt. Ich hawwe mich fier die alte Rassen entschiede statt die Hybrids. Die Hybrids duhn zwar gut legge, fast een Oi ieder Daag, awwer sie duhn sell yuscht fier 2 Yaahre un nachhert sinn sie ausg’brannt. Die alte Rassen dagegge legge zwar wennicher Oier, awwer sie brenne nit so schnell aus un legge weiter fier viele Yaahre. Sie henn aa wennicher Gesundheitsbrobleme. Also hawwich 8 kleeni New Hampshire Reds un 8 kleeni Delawares kaaft, gude alte usamerikanische Rassen, die scheene braune Oier legge waer’n, wann sie aafg’wachse sinn. Un geschter, as ich in Feed Store war, henn sie blaue Cochins g’hatt zu verkaafe. Nadierlich hawwich mich nit trickhaalde kenne, 2 Cochins zu kaafe! Sie sinn aa ‘ne uralte Rasse, mit Federn aaf die Beene. Un sie duhn aa aaf die Oier hocke un selwwert kleeni Hinkele ausbriete un grossziehe. Die Hybrids un viele annere moderne Rassen kenne sell nit meh. Man hot aus sie Oierleggemaschins g’macht, die yuscht legge un nix meh wie normale Hinkele benehme. Ich haww’ nix gegge die moderne Rassen un Hybrids un ich haww’ sie aa selwwert g’hatt, awwer mir sinn die eldere Rassen insrer Voreldere liewwer. Doug, in dei Bauereivideo hawwich g’merkt, ass die Hinkele aaf die Bauerei deinre Familie Hybrids sinn, awwer mindeschtens hoscht du sie g’lannt, PADeitsch zu schwetze!
Danka fer dei scheena Worda, Jim! Was fer en hardes Lewe die Fraa Schuhmacher hot erlebt. Mer ruft uns die “Volga Deitsche” – nadierlich weil unsera Leit an der Volga Riwwer hun gewuhnt. Ich gleich zu saaga, ass ich bin “Vulgar German”! 😉 Mach’s gut! Eric