Guder Daag Blog Leser! Neilich hawwich meh Zeit im Schpiggel rumgebrocht. Nee, nee, ich bin net eigenumme. Ich muss mich oftmols aagucke, weil ich eppes neies seh: grohe Haar. Nau ich weess, dihr denkt: “Aye yummer Doug, du bischt net alt! Du bischt yung un schtarrick un gutguckich.” Ich glaab so aa, awwer wann ich in dem Schpiggel guck, es Bild es ich seh, saagt eppes anneres.
Nau fer die Record, im Tschulei waerr ich 37 Yaahre alt sei. Awwer, mei Baart un Kopp saage ass ich elder bin. Un ich muss ehrlich saage ass des Broblem eigetlich nei iss. Ich hab uff alde Pickders geguckt, un yuscht zidder die letschde drei Yaahre odder so hawwich grohe Haar. So ferwas in yuscht die letschde drei Yaahre? Well was saagt die Science? Der Dr. Steven Dowshen saagt as grohe Haar kumme vun:
“As mir elder waerre, die Pigment Cells in unsere Haar Follicles schtarewe langsam aus. Wann es wennicher Pigment Cells in en Haar Follicle gebt, waerr es Haar net lenger so viel Melanin hawwe un waerr meh vun en Transparent Fareb hawwe – wie groh, silwer, odder weiss – ass es waxt.”
Ok, so nau weess ich ferwas mei Haar groh iss, awwer gebt es Dinge im Lewe die helfe mei Haar gschwinder groh zu geh? Die Science saagt, vielleicht. Viel Doktors saage ass es drei Dinge gewwe die helfe Haar groh zu geh:
1. Unsere Genes: Caucasians gehe groher gschwinder ass Asian un Afrikannische Leit. Well, ich bin en Caucasian, so…..
2. Schtress: Schtress un Grankheite kenne Haar groh zu geh helfe, vielleicht schneller ass es normally daete. Mei Tschopp hot Schtress, des iss fer schurr. Fimf Daage die Woch mit Teenagers schaffe, dei Haar daete aa groh geh!
3. Unser Leweschtil: Schmoke un zu wennich Vitamin B-12 helfe Haar groh zu geh. Ich schmok net (ab un zu gleich ich en Cigar im Sommer zu frehe). Vielleicht soll ich meh Esse mit B-12 esse wie Fisch, Soy, Fleesch, Kaess un Oier. Aye Yummer, ich ess viel Kaess un Oier schunn! Ya well, wann ich muss, dann muss ich!
So nau weess ich meh iwwer mei “Broblem”. Awwer iss es eigetlich en Broblem? Mei Fraa saagt as ich gut mit glee bissel grohe Haar guck. Annere Leit saage as ich “reif” odder “distinguished” guck. Awwer saage sie sell yuscht ass ich net zu alt fiehle? Sell weess ich net. Ich weess fer schurr as ich will mei Haar net farewe losse. Wann ich groh bin, glaab ich so iss was der Gott will. Un was kann ich dezu saage? Ich fiehl mich yung, sell iss fer schurr. Un net vergesse ass mer saagt: Wann es Schnee uff em Dach gebt, des mehnet net ass es ken Feier im Haus gebt…
Do iss en Audio Klip:
PA Dutch 101 
Hallo liewwer Doug!
I glaub Du bischt net so alt. Siewweundreissig isch nadierlich net siewweunzwanzig–un ‘sisch awwer lange net no alt wie i!! Stell di emol vor: i bin ja 57 un im Mai werd’ i 58!! Awwer du daes senn bloss Zahle. Ma isch so alt wie ma sich fiehlt, lautet daes so sprichwoertlich. Alt nenn’ i sell awwer net, ma hot doch eppes g’lernt: Erfahrung hoscht du g’sammelt. Wenn unser Herrgott will, wirscht du au no e langes Lewe mit Deinre Frau un die Kinnerle g’niesse un so wunnervolle A’laesse un Feiere mitmache koenne, gute Zeete z’amme mit viel Liewwe. Gell, Du hoscht e Perle g’kriegt: Gott hot Di die beschte Frau g’gewe, un die scheenschde Kinnerle dezu. Wertvoller senn sie wie die scheenschde Edelsteine 😊. Die Segen tuscht Du jed’n zaehle, dessen bin i sicher.
Mit scheenschte Griesse aus Pittsburgh,
Dei
Jim (Jakob der Alte😊) Kramer
Liewwer grohe Haar als keene Haar, Doug!
Hefr Spees: Es isch au net so schlimm, we’ma koi Haare meh’ hot: e Glatze diht oft gut ausschaue. Der Schauspieler Bruce Willis hot z.B g’nau wie i keene “Kopfbedeckung”😊 E Freind vun mi hot eemol g’saat: d’r Herr hot eenige perfekte Koepfle v’rschaffe, un dene Rescht hot er mit Haare b’deckt😊 I glaub’ ma isch net zu alt solang ma lache ka’: hot ma Humor un G’sundheet, so isch ma wirkli e reicher Mensch, gell?😊