Guder Daag Blog Leser! Well, maryie iss en grosse Owed in Hollywood. Die Academy Awards waerre rausgewwe. Ich muss ehrlich saage ass ich ken vun de nominated Movies gsehne hab! Aye aye aye. Nau, ich bin en grosse Movie Fan, awwer meh en Fan fer die alde “classic” Movies. Zidder ich en gleene Bu waar, hawwich allsfatt die schwatz un weisse Movies gegliche. Ich weess net ferwas, vielleicht weil die Gschichte besser waare? Odder vielleicht weil ich aa en grosse Fan vun Slapstick bin. Ich bin so froh as mei Cable Kumpani Turner Classic Movies ass en Channel in mei Haus hot. Mir schwezte oft iwwer Blockbusters, awwer ich denk as es Yaahr 1939 en Blockbuster Yaahr fer Hollywood un fer uns waar. Des Woch will ich glee bissel iwwer die gut bekannte Movies vun em Yaahr 1939 schreiwe. Sie sin in “no particular oder”.
Stagecoach: von dem John Ford mit en All-Star Cast: John Wayne, Claire Trevor, Thomas Mitchell (Oscar Gewinner fer Best Supporting Actor), und John Carradine. Ich denk as Stagecoach die perfekte Western iss. 9 Paersons faahre vun Arizona nooch Nei Mexiko in en Stagecoach. Es gebt Inschinge Fechte, Outlaws un Marshalls, viel Schiesserei, un Liewe. Un alles waar in em scheene Monument Valley gefilmt.
Gone with the Wind – Oscar: Beschde Film: vun dem Victor Flemming (Oscar Gewinner fer Best Director) mit Vivien Leigh (Oscar Gewinner fer Best Actress), Clark Gabel, Olivia de Haviland und Hattie McDowell (Oscar Gewinner fer Best Supporting Actress). En Gschicht aus de diefe Sudde in der Zeit vun der Burgergrieg in Amerika. Es gebt Liewe, Drama, un Gschichte. Scarlett O’Hara muss duhne was sie kann fer ihre Familye un ihre Plantation: Tara. Awwer wu liegt ihr Hatz? Mit Rhett Butler odder mit Ashley Wilkes?
Mr. Smith goes to Washington: vun dem Frank Capra mit James Stewart, Jean Arthur and Claude Rains. Iss Waschington DC verhaust? Der Jimmy Stewart schpielt Senator Jefferson Smith, en Draamer un en Senator der macht was er denkt recht iss, geht nooch Waschington um en Unnerschitt zu mache. Ich denk as yede Amerikaaner soll des Movie sehne. Un die Corruption die im 1939 Waschington waar, iss allsfatt nooch datt.
The Wizard of Oz: vun dem Victor Flemming mit Judy Garland, Ray Bolger, Bert Lahr, Frank Morgan un Jack Haley. The Wizard of Oz waar der aerschde Movie in Schwatz un Weiss un aa Farewe gefilmt. Wer kennt des Movie net? Mir reise mit der Dorothy nooch Oz, en abbadiche Welt. Sie macht neie Freinde mit en Butzemann, en Blechmann, un en Leeb. Sie drefft aa en iewele Hex. Die Dorothy un ihr Hund, der Toto, versucht zerick nooch Kansas zu faahre. Un mir kenne net vergesse ass des Film uns “Somewhere Over the Rainbow” gewwe hot.
Of Mice and Men: vun dem Lewis Milestone mit Burgess Meredith, Betty Field, un Lon Chaney Jr. Des iss en Film vun dem gut bekannte Buch vun dem John Steinbeck. Der George un Lenny versuche zu iwwerlewe in Dustbowl Era Amerikaa. Es iss ein Gschicht iwwer Freindschaft un der Fecht um en eegenes Schtick vun re Welt zu finne.
Young Mr. Lincoln: aa vun dem John Ford mit Henry Fonda, Alice Brady, un Marjorie Weaver. Der Movie folgt der Abraham Lincoln eb er nooch Waschington as Bresident gange iss. Es zeigt uns wie der yunge Lincoln waar un wie sei Erfaahringe hot sei Lewe beeiflusst.
So wann du glee bissel Zeit hoscht, guck mol en Movie aus 1939 aa. Ich glaab du waerrscht es gleiche! Awwer die Froog liegt noch: wann kummt en guder Film iwwer uns Deitsche raus? Hoffetlich net zu weit in der Zukunft!
Do iss en Audio Klip:
PA Dutch 101 
Ich gleich selle alte Movies aa! Wie du g’satt hascht, war’n die Schtories besser, un sell mitaus Millionen vun Dollars auszugewwe. Un wann ich een Bu war un ins Kino gange bin, bevor der Hauptfeature geschtartet hot, hen sie uns luschdige Shortfilms wie die 3 Stooges odder Zeichentrickfilms g’zeigt. Heit ins Kino sehnmer die gleiche Scheisscommercials wie aaf’m Guckbax bevor der Hauptfeature schtartet!