Guder Daag Blog Leser! As viel vun eich schunn wisst, bin ich en grosse Gschichte Fan. Des Woch will ich eich en coole Schtick aus unsre Gschichte bringe. Es Yaahr 1816 iss gut bekannt as es Yaahr mitaus en Summer. Awwer wie schlecht waar es eigetlich?
Was exactly es seltsame Wedder verursacht hot, wisse mir nau: Volcanic Activity. Awwer im 1816 hen die Leit net gewusst. Vun 1812 bis 1814 hot es vier Volcanic Eruptions gewwe un sie hen viel Esch un Schtaab in die Luft gschtellt un die Temperatures um re Welt sin nunnergange. Die Uffblosse vun Mount Tambora im 1815 waar een vun de mechdichschtichsde Uffblosse in Welt Gschichte un hot meh Schtaab in die Luft gebracht. Des Schtaab hot Solar Hitz gschpiggelt un es Wedder waar kiehler as Normal. Die Esche un Schtaab hen aa oft Newwel gewwe un die Leit hen oft arrig scheene Sunneuffgenge un Sunneunnergenge gsehne.
Schnee in Tschunn hot Drifts vun 18 Zoll hoch in Philadelphi gewwe! In de Nei England Schtaate, Tschulei un Aagscht hen Temperatures so nidder as 40 Graad gewwe. Es Kalt waar so schlecht as gfrorne Veggel sin vum Himmel uff die Schtrosse vun Montreal gfalle un Gdiere die zu lang drausse waare, hen zum Dod gfrore. Uff dem 20. Aagscht en Schnee Schtarem iss darrich Nei England gange un es hot was gleene Blanze die nooch iwwerlebt hen, dodgemacht, un Schnee uff 26. September hot all die Eppel gfrore. Esse waar so raar as die Preise gedoppelt un gedreifacht hen. Der Preis vun Hawwe iss vun $0.12 en Buschel im 1815 ($1.57 heit) zu $0.92 en Buschel im 1816 ($12.98 heit) gschteigt!
Annere Naame fer es Yaahr waare: “Achtzehhunnert un Gfrore zum Dod” un “Es Aarmut Yaahr”. Awwer es waar net allsfatt eiskalt. Die Temperatures daete schteige un dann ganz gschwind nunnerfalle. In Tschulei un Aagscht, hot es Eis uff Wasserlecher un Rewwer in naddwescht Pennsylvaania gewwe.
Ich hoff as mir waerre net so was in unsre Lewwe erlewwe! Ich gleich Summer, un ich kann net lewe mitaus gude frische Gaardesache vun meim Gaarde! So nau, sei so gut, un saag en Bed as es ken meh Volcanic Activity gebt!
Do iss en Audioklip:
PA Dutch 101 
So en Bed saag ich aa, Doug! Wie du, gleich ich Summer. Ich haw’ aa g’lese, ass viele Leit im Yaahr mitaus en Summer verhungert sinn, weil es keen odder weit weenicher Gaardesache wie normal g’gewwe hot.
Hallo Liewwer Doug un alle, wu seller Blog duhne lese!
Driewer haww i in mein’re Kindheet g’lese un schier v’rgesse! I b’dank mi sehr fier Dei Interesse a’ die G’schichde un fier sellre interessande Sache, die Du uns e jedesmol bringe duscht! I stimm mit ei: e Johr ohn’ Sommer isch mi au undenkbar!!! Waerme, Frische, blauer Himmel, gelwe Sonne’schei’, hie un do e bissele Rege, Blume, griene Blaetterle a’ dene Baeume–so eppes daet mi arg fehle. Au frisches Obscht, Liewwesaepfele (Tomate) aus’m Gaertle, Maiskorn mit Butter, un so weit’r duht ‘m Herzle doch gut.
I wuensch Di, Dei liewwe Fraa, die Kinnerle un Dei ganze Familie alles Gute im Johr 2017, un i hoff ja, ‘s Friehjor bald kumme wird un von ‘m wunnerscheene Sommer g’folgt wird.
Scheenschde Griesse aus’m Grosstaedtle zum Weschde
duht Eich sende
Eier
Jim (Jakob) Kramer
Seller Pittsburgher Kerl