Do iss en Link zu mei yaerhliche Video Reed:
Un do iss en Copie vun de Wadde:
Guder Daag liewe Blog Leser un Leit in YoutTube Land! Well es Yaahr iss widder rum un es iss Zeit fer mich en Grischtdaag un Nei Yaahr Video zu mache. Es fiehlt sich as ich letschdem Yaahr sei Video graad gemacht hab, awwer nee, zwelf Munet sin schunn vorbeigange.
So loss mich mit en katze Rickguck uff ee paar Dinge aafange, die im Yaahr 2016 gschehe sin. Viel schlechde iss im 2016 gschehe. Vielleicht solle mir 2016 as es Yaahr vun Iwweraschinge benaame? Errinert dihr an Brexit? Der Trump?
Im Yenner hot es neie Grankheit gewwe: Zika. Viel Zeit sin vun Mosquitos gschtoche un sie hen die Grankheit grickt.
Im Hanning hot der Punxsatawny Phil der Grundsau sei Schadde net gsehne…es Friehyaahr waar graads um Eck rum. Awwer, der Phil waar net so richdig! ‘Sis waar arrig kalt. Oft hemmer Temperatures ghatt die Minus waare. In Matz drei Bombs sin in Brussels, Belgium nuffgange. 32 Leit sin gschtarewe un 250 waare verletzt.
Im Tschunn Great Britain hot gewaehlt raus vun der European Union zu kumme. Es waar as Brexit benaamt. Sell waar en arrig grosse Iwwerasching gewest. In Aagscht waare die Olympic Schpiele in Rio de Janiero, Brasil.
Im Oktower un im November waar en grosse TO DO do in Amerikaa. Mir hen en Elektion ghatt. Vielleicht hett dihr glee bissel vun es gheert? Am End hot der Donald Trump gewunne. Ya, der Trump, en Business Mann waerr unser 45th Bresident sei. Mir wisse nooch net wie sell gehne waerr. Ich kann sicherlich saage as viel Leit in Amerikaa sin froh un graad so viel Leit sin drauerig. Die Hillary Clinton hot meh Schtimme grickt, awwer der Trump hot die Electoral College gewunne. Nau muss er sei Actions schtelle wu sei grosse Maul iss!
Im Diesember hot es widder en Terror Aagriff gewwe, des mol waar es in Berlin, Deitschland un es waar uff en Grischtdaagsmarrick gewest. 12 Leit sin gschtarewe un viel Meh sin nooch in Grankehaus. En Mann hot en grosse Truck gschtole un hot es darrich der Marrick gfaahre.
Un 2016 hot net der End vun der grosse Grieg in Syria gsehne. 5 yaahre lang gebt es schunn Grieg do. Die Videos vun Syria sin arrig hatt aazugucke.
Viel bekannte un wichtige Leit sin im 2016 gschtarewe: David Bowie, Alan Rickman, Antonin Scalia, Harper Lee, Nancy Reagan, Merle Haggard, Prince, Muhammad Ali, Elie Wiesel, Gene Wilder, Arnold Palmer, Shimon Peres, Fidel Castro un John Glenn.
Fer ich un mei Familye, 2016 waar en gudes Yaahr. Mei Kinner sin gewaxe un mei Dochder schwetzt meh Deitsch yeder Daag. Der gleene Oscar kann endlich Wadde saage! Un mir hen en neie Hund, en Poodle mit dem Naame Miles grickt. Er kann aa Deitsch gut verschteh!
So nau iss die Zeit wann mer uff en abaddiches Bobbli denke. Grischtdaag iss viel meh as Gschenke, Beem mit Lichter, grosse Iems un scheene Lieder. Fer uns Grischtliche Leit, iss es en neie Aafang un der Aakumme vun unserem Herr. Unser Herr, der kummt um all unser Sinde wegzunemme.
Mei Winsche fer eich des Yaahr sin as mir do in re Welt Fried finne kennte, as Leit die ken Haus hen, en Blatz finne kennte, as die Leit die mitaus Arewet sin, en gude Tschopp finne kennte, as die Leit die grank sin, en Antwatt zu ihre Brobleme finne kennte. As die Lenner in re Welt die in Grieg sin, en ewige Fried finne kennte. Ich weess schunn as der Belschnickel net all mei Winsche vollende kennt. Awwer ich froog ihn ennihau.
Paersehnlich, will ich glee bissel meh saage. Sell kummt graad vun meinem Hatz: Ich bin so froh fer all die Unnerschtitzung as all mei Blog Leser, Facebook Freinde un annere Internet Freinde mich im Yaahr 2016 gewwe hen. Nadierlich waerr ich im 2017 widder neie Blog Poschts schreiwe un Videos mache. Nadierlich waerr ich so viel duhe as meeglich fer unsere scheene Schprooch zu behalde. Ich hoff as all vun eich mir mithelft.
Awwer fer nau saag ich eefach: Hallicher Grischtdaag un ich winsch eich en halliches, glickliches un gsundliches Nei Yaahr 2017. Bis Yenner, macht’s gut un schwetzt Deitsch.
PA Dutch 101 
Hallo liewwer Doug,
Endlich isch es mi g’lunge, Dei Stimm zu heere! Du hosch e scheene Aussprooch, schier wie die Amischleit, awwer nadierlich e bissele annerscht. Du duscht di au an die gute Grammatik halde, was bei d’Amischleit net immer vorkummt. Dei Stimm klingt awwer wie die vun eenem Arweetskollege vun mi, der e rechd gutr Sinn fier Humor hot un au rechd nett isch. Er isch awwer irischer Abstammung un versteht kei Deitsch. (E bissele Franzeesisch kann er, awer au net zu viel).
I winsch eich (un Du woischt awwer, i v’rsuch so z’schreiwe, dass die Umlautte net do seie, weil viele Deitsche in USA se nemmer verstehe kaenne) alle frohe g’segnete Weihnachte, e glickliches g’sundes neies Johr un alles Gute fier Leib’ un Seel’! Wie schee, dass die gleene Estella un d’r Oscar vun Di Deitsch lerne!! I glaub, oi’mol hoscht du erwaehnt, Dei Fraa duht es mittlerweile au lerne, gell?! Eefach herrlich isch’s ja!
Im gleiche Sinn saag i Di au: mach’s gut un schwetz no Deitsch! (In mei’m Fall Schwobisch-Badisch-mit-wer-woiss-no-was-dezu-vermischt haha).
Bis bald,
Dei
Jim (Jakob) Kramer
[Seller Pittsburgher Kerl]
Hallo Doug,
Danki fier dei scheene Wadde. Egal was man vun’m Donald denkt, ob man fier ihn g’stimmt hot odder nit, ich hoffe ass er um Amerikas willen een guder Teschop duht. Wie du g’satt hoscht, selles Yaahr hemmer viele gude Leit wie John Glenn un Eli Wiesel verlorne, awwer um Fidel Castro iss die Welt um een Saubaer weennicher reicher.
Ich hoffe, dass alle dei Winsche fier ne besser Welt mit Frieden un een besseres Lewwen fier alle Leit die arm sinn odder mitaus Arewet sinn odder grank sinn
wahr kumme un ich winsch dir un deinre Family een halliches Grischtfescht in Gottes Segen in 2017.
Bis ball,
Jack