Guder Daag Blog Leser! Well, des Woch iss endlich die grosse Lecktion do in Amerikaa. Gott sei Dank! Ich hab warricklich genung vun alles ghatt. Es Guckbax iss voll mit schlechde Commercials un yeder Daag grick ich vier bis fimf Dinge vun Kandidaade in mei Mailbax. Nadierlich der Bresident Fecht iss heess. Der Donald un die Hillary sin wie zwee Kaader…allsfat am yammere un gratze. So die grosse Froog iss: in wem verdrauscht du aa? Die Republikaaner un die Demokraate saage ass ihre Kandidaat besser iss. Fer mich paersehnlich, schtell ich mei Verdraue in was Gott in dem 121. Psalem saagt. Vielleicht wann meh Leit aa ihre Verdraue in de Wadde vun sellem Psalem schtelle daete, waerre mir ok sei. Graad in Zeit fer die Lecktion iss der 121. Psalem:
Ich waerr mei Aage zu de Hiwwele uffhewwe –
vun wu kummt mei Helfe?
Mei Helfe kummt vun dem Herr,
der der Himmel un die Aerd gemacht hot.
Er waerr net erlaawe dei Fuus gemuckt zu sei;
er, wer dich bhaldet, waerr net schloofe.
Guck, er, der Israel bhaldet,
soll net schlummer un aa net schloofe.
Der Herr iss dei Bhalder;
der Herr iss dei Schadde uff dei rechde Hand.
Die Sunn soll dich net am Daag schlagge,
un aa net der Moond am Nacht.
Der Herr soll dich vun all Iwwel behiede;
er soll deine Seel behiede.
Der Herr soll dei Rausgeh un dei Reigeh behiede,
vun des Zeit un aa in die Ewigkeit.
Wer gewinnt am Dinschdaag, gewinnt. Mir beede fer Fried un Gedeihigkeit in unser Zukunft. Nau geh naus, schtimm ab, un sei schtolz ass mir in so en Land wuhne wu mir mitaus Verfolgkeit abschtimme kenne.
Do iss en Audio Klip:
PA Dutch 101 
I don’t think we’ll be voting the same way, but this is the best commentary I’ve read on this election. Thank you.
Nicholas, gross dank fer dei Comment. Was so gut iwwer Amerikaa iss ass du un ich vielleicht waerre fer verschiddliche Leit abschtimme un mir kenne allsfat widder zammekumme un schwetze.
Liewwer Doug,
Wer GOtt vertraut hat wohl gebaut!!!
Dei
Jim Kramer
(au g’nannt Jakob)
Seller PIttsburgh Kerl
🙂