Guder Daag Blog Leser! As viel vun eich schunn wisst, ich gleich Motorcycle zu faahre. Ich gleich abbadich im Schpotyaahr zu faahre. Die Luft iss glee bissel kiehler un die Bledder sin so farewevoll. Des Woch hawwich die Meeglichkeit ghatt, fer en Reid zu geh. Ich hab gepickt nooch Ole Bull Schtaat Park zu faahre. ‘Sis baut een un halwer Schtunnd vun mei Haus un der Weg datt iss arrig schee. Der Weg: Route 144, geht darrich der Busch un iwwer viel Bariye. Ole Bull Schtaat Park iss in Potter Kaunty, PA. Die grosse Frooge sin, wer waar der Ole Bull un fer was hot er en Schtaat Park mit sei Naame? Well die Gschicht find ich arrig inderessant.
Der Ole Bornemann Bull waar uff dem 5. Hanning, 1810 in Bergen, Norway gebore. Sei
Daadi hot gewollt as er en Parre waerr awwer der Ole hot vun yung aa die Geig gut schpiele gekennt. Er hot aa in Deitschland un Frankreich gelebt. Bis 1828 waar er schunn en Virtuoso. Er hot dausende vun Concerts gewwe. In England hot er 274 Concerts im Yaahr 1837 selwer geschpielt! Der Bull iss arrig bekannt gewest un hot viel viel Geld verdient.
Der Bull hot Amerikaa oft bsucht. Im 1852 hot er 120,000 Acker fer $10,000 in Pennsylvaania kaaft. Er hot en neie Kolonie gegrindt: Nei Norway. Die Kolonie hot vier Schtedt ghatt: Nei Bergen (nau Carter Camp), Oleana, Nei Norway, un Valhalla. Der heechschte Barrig waar der Valhalla, un es iss datt wu er en Castle (Nordjenskald) gebaut hot. Es waar nimmi faddich gebaut. Eventually die Kolonie iss zu nix gange weil es hot ken gude Grund gewwe fer bauere. Die Kolonies hen yuscht ee Yaahr ausgedauert.
Ole Bull Schtaat Park iss nau wu Nei Norway waar. Die Norwegians sin net zerick nooch Norway gange, awwer im Blatz vun sin sie nooch Minnesota un die Dakotas gange. Im 2002, es Land Norway hot en Gedechtnis im Ehr vun dem Ole zu Pennsylvaania gschenkt.
Do sin ee paar Pickders vun mei Motorcycle Reid nooch Ole Bull Schtaat Park:
Do iss en Audio Klip:
PA Dutch 101 
Hallo Doug,
Wi schee isch es awwer do, wu Du mit’m Modorrad g’fahre bischt! Vun Ole Bull haww i nie frieher eppes g’heert, d’r Name isch awwer rechd interessant. So wunnerbare G’schichde bringscht Du uns, un i b’dank mi herzlichscht dofier!! I hoff, di un deinre Familie gaht’s nur beschdens, un i hoff au, dass Du richtig vorsichtig beim Fahre g’wae bischt. Du hosch doch e liewwe Familie, un mer meechde, dass Du doch e gutes, g’sundes un langes Lewe wirsch g’niesse! (Diesmol versuch‘ i, mein Mundart ohne Umlautte z’schreiwe. Mer schwätze schier wie die Pennsylvanier in dieser Hinsicht: alle Umlautte werde entrundet: ä=kurzes e, so ungefähr wie im Wort “wenn” ; ö=langes e [ee od’r eh, also wie im Wort Schnee], ü=schier wie ie od’r langes i , wie ma‘ die Vokale uff Hochdeutsch ausspreche duht. S’isch net so leicht, so z’schreiwe, awwer v’leicht duhne die annere Leser/inne sell no besser verstehe, wenn se’s so sehe, wie die Pennsylvanisch Deitsche sellre Worte schreiwe. Unser „R“ isch kehlhaft, awwer net so hart „gerasselt“ (net so hart wie im Norde vun Deutschland, wu man oft e richtig’s „Zäpfchen R“ also rrrrrr z’heere b’kummt! Du haettescht doch mei Hamburgische Noochbarin heere solle–schier wie e Motor hot ihr R g’klunge. Eine rrrrrrichtig liebe Frrrrau aber war sie, wirklich ein Beispiel, wie ein Christ leben und denken sollte). I meecht Di awwer eppes rate: Beim Fahre isch b’kanntlich Vorsicht besser als Nachsicht! Du bischt ja e guter Fahrradfahrer, awwer ma muss uff die ANNERE uffpasse, weil se oft net so g’scheit senn. Sell hot mi mei Mutter emol g’saat: mei Fahre, hot se g’meent, sei gut un sicher g’wae, es senn awwer die annere Autofahrer, uff die ma Acht gewe muss, gell net?
Nu, Bleib g’sund, g’niess `s Lewe, un mer hoffe, dass es immer so e scheene Blogseite vun Di gewe wird!
Scheenschde Herbschdgriesse an Di un Dei liewe Familie (wenn au unbekannterweise) aus’m Grossstädtle zum Weschde
Dei
Jim (Jakob) Kramer
Seller Pittsburgher Kerl