Guder Daag Blog Leser. Des Dunnerschdaag, der 25. Aagscht, waar en grosse Gebottsdaag fer die National Park Service. 100 Yaahre zerick waar die Park Service gegrindet. 
Die National Park Service iss antwattlich fer die Iwwerseh fer all National Parks un National Monuments. Die Service gheert zu der Department of the Interior un letschdes Yaahr hot sie en Budget vun $2.9 Billyonen. Sell iss viel Geld, awwer denk mol an wie viel Land un Bletz sie unnerschtitze!
Es gebt ee paar wichdige Leit in die Gschicht vun National Parks un die National Parks Service:
John Muir: der John Muir waar een vun der aerschde “Conservationists” in Amerikaa. Er hot alles aagfange mit sei Ruf fer die Behiede vun dem Yosemite Daal in nadd-Kalifornia. Er hot viel Bicher iwwer Nadur un der Nadur ihr Graft iwwer uns Leit gschriwwe. Er waar aa een vun de aerschde Mitglieder vun der Sierra Club. Er hot gsaat: “Die Bariye rufe un ich muss geh.” un “Alli-epper braucht Scheeheit wie Brot, Bletz in zu schpiele un zu bede, wu Nadur kann heele un gewwe Graft zu Kareber un Geischt.”
Theordore Roosevelt: Mir kenne ihn as der 26. Bresident. Er waar aa wichdig in die National Parks Aafang. Im Yaahr 1906 hot er die Antiquities Act gemacht un die hot 18 National Monuments behiedet. Er hot aa 5 National Parks gemacht un meh as 50 Veggel Reserves un 150 National Busche gemacht. Er hot gsaat: “Gediere un die Beem kenne net schwetze, so mir misse un mir waerre.”
Stephen Mather: der Mather waar der aerschde Director vun der NPS. Bevor 1916, der Mather waar en Millyonaire. Er hot sei Geld in Advertising gemacht. Business waar wichdig zu dem Mather awwer Nadur waar aa. Im 1916, Bresident Woodrow Wilson, hot der Mather as Director vun der neie NPS gemacht. Un was en gude Idea sell waar. Er waar der rechte Mann fer die Tschopp. Es waar der Mather der hot die National Parks gemacht as mir sie heitzudaage kenne. Der Mather hot die Parks Yuuser freindlich gemacht, un mit sell, hen Leit die Parks bsucht.
Die National Parks Service iss antwattlich fer iwwer 400 Bletz (59 National Parks) un hot baut 22,000 Schaffleit. Die Parks sin do fer all Amerikaaner. Amerikaa waar es aerschde Land mit National Parks, un mir kenne arrig schtolz sei fer sell. Do in Pennsylvaania, es gebt viel National Parks Service Bletz. Do iss en Link um meh zu lanne!
Fer mich paersehnlich, die Parks sin arrig wichdig. Ich hab viel Parks schunn bsucht un ich waerr meh Parks erlewe. Sie saage unser Gschicht un zeige alles was gut in unserem Land iss. Wann du nooch net en Park bsucht hoscht, geh! Sie kenne dich en neie Sicht gewwe.
Hallicher Gebottsdaag National Park Service!
Do sin ee paar Pickders vun National Parks die ich bsucht hab:
Do iss en Audio Klip:
PA Dutch 101 
Liewwer Doug,
Nomols beschde Dank für Dei Blog—un diesmol b’sonders für die wunnerschöne Bilder od’r wie etwa d’Pennsylvanier ‘s so schö saage, die „Pikders“.
Schönschde Grüβe aus’m Groβstädtle zum Weschde
Dei
Jim (Jakob) Kramer
(Seller Pittsburgher Kerl)