Dem Mann sei beschde Freind!

Guder Daag Blog Leser! As viel vun eich schunn wisst, bin ich uff en Bauerei uffgwaxe. Nadierlich hemmer allsfatt en Hund ghatt. En Bauerei mitaus en Hund iss ken Bauerei! Dann bin ich fattgange um uff der College zu geh. Fer vier Yaahre hawwich ken Hund in mei Lewe ghatt. Dann wann ich faddich mit re Lanning waar, hawwich widder en Hund grickt, en Golden Retriever mit dem Naame, Sadie. Sie waar en arrig guder Hund, siess, ruhich un liebvoll. As sie gschtarewe iss, bin ich viele Yaahre mitaus en Hund gewest.

Im Yaahr 2010 bin ich gheiert un hab en Haus kaaft. Die Yaahre sin zimmlich schtarrig vorbei geloffe. Dann sin mei zwee Kinner kumme. Un widder sin die Yaahre vorbeigange. Ich muss ehrlich saage, es Lewe waar so busy, ass ich zu mir selwert gsaat hab, mir hen ken Zeit fer en Hund. Ich kann net glaawe ass ich so gedenkt hab. Fer es letschde Yaahr odder so, mei Dochder hot alle Owed fer en Hundli gebetet. Ich hab gewusst ass es Zeit waar widder en Hund zu hawwe.

Fer die letschde paar Woch bin ich im Internet gange um en Hundli zu finne. Es Broblem iss ass nau ass ich elder bin, hawwich Allergies gege Pet Dander. Ich weess net ferwas, awwer so iss es. ‘Sis so schlimm, ass ich net in en Haus gehe kann wann sie en Katz hen. So ich hab gemisst en Hypoallergenic Hund zu finne. Es gebt ee Paar Breeds die so sin. Ich hab aa gewollt en grosse Hund, ich gleich sie viel besser as gleene Hunde. Zum Glick hawwich mei Research geduh un en guder Breed gefunne: en Standard Poodle, odder as sie in Hochdeitsch saage: en Keenichspudel.

Endlich geschder sin mei Dochder ihre Bede geantwattet. Mir hen en Breeder in Clearfield Kaunty gfunne die Hundli hot. Mir sin een un en halb Schtunn gefaahre um unser neie Freind zu griege. Mir hen mei Dochder vollig iwwerascht ass sie heem vun der Day Care kumme iss.

Nau hemmer der Klang vun vier haarige Dobe im Haus, un so siess en Klang iss es. En Haus mitaus en Hund iss net so vollschtendich ass en Haus mit en Hund.

IMG_4953
Mei Familye mit unserem neie Hund: der Miles.

Do iss en Audio Klip: 

 

 

1 thought on “Dem Mann sei beschde Freind!

  1. Jim (Jakob) Kramer 13/07/2016 — 16:09

    Hallo liewwer Doug!

    Nu bin i d’r erschde, wu eich herzli’ Gratuliere wünsche duht, gell?! Euer neier Hund sieht doch super aus!!

    I muss au saage, Dei Familie schaut doch wunnerbar aus—un mei, Dei gleener Oscar isch scho am Wachse, gell net?! Er isch ja e richtiger Deitscher Bu! Die Estella isch au am Wachse, sell isch doch selbschtverständlich, so e liewwes Mädele–un sell duht dem Herze doch gut, gell? Wie ihr alle do sitzt, isch wirkli e wunnerbares Bild: Mama, Papa, die Kinnerle un „däs neie Mitglied vun d’r Familie au!“

    ‘S isch awwer au gut, dass Du mol ‘n sympathischen Hund g’funne hoscht–net jede Zucht vun Hündle geht richtig mit Kinnerle um, awwer Du bischt e g’scheiter Mann un hoscht sozusaage Dei Hausaufgabe g’macht!

    Nu, mit herzliche Sommergrüsse aus’m „Groβstädtle zum Weschde“ un au gute Wünsche für weiterhin viel Spass un Freud‘ im Familiekreise
    bin i

    Dei

    Jim (Jakob) Kramer
    (Seller Pittsburgher Kerl)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close