Guder Daag Blog Leser! Ich will mit des aafange: Hallicher Gebottsdaag Amerika! Ya, Mariye iss mei Land 240 Yaahre alt un sie guckt allsfatt nooch yung zu mir. Ich waar die letschde 11 Daage in Deitschland so ‘sis siess widder heem zu sei un zu feiere. Des Woch will ich en katze Poscht schreiwe. Fer ee paar Daage hot en guder Leser mir en EPoscht gschickt. Er hot mich gfroogt Yankee Doodle in Deitsch zu iwwersetze. Weil Mariye der 4. Tschulei iss, find ich sell en gude Idea! So do iss es in Ehre vun Amerika ihr Gebottsdaag:
Yankee Doodle
Yankee Doodle iss zur Schteddel gange,
Reidet uff en Pony,
Hot en Fedder in sei Hut gschteckt
Un hot’s Macaroni genaamt!
Chorus:
Yankee Doodle hald es uff,
Yankee Doodle dandy,
Meind die Myusick un die Schritt,
Un mit de Maedle sei hendich.
Des reimt net so gut uff Deitsch awwer mer kann es ennichau singe! Ich winsch all mei Leser en wunnerbaar 4. Tschulei. Hett viel Gschpass uff eiere Picknicks, esst viel un drinkt ee paar Biere uff dem John Adams, dem Thomas Jefferson, un dem Benjamin Franklin. Sie daete arrig gaarn aa mitdrinke wann es meeglich waar!
PA Dutch 101 
Ya gewiss! Ich huff oss all dihr en hallicher Fiert fun Tschulei g’hatt hend. Uff do in Kanada henn mir unser naeschenal holiday g’hatt omen aerschd fun Tschuly.
Well, sell iss yuschd baut olles woss ich hop schreiwa wulla.
Machs guud unn bleib aus dummhayda.
Hallo Liewwer Doug un alle annere Leser!
Schönschde Grüsse nomols ausm Grossstädtle zum Weschde vun Pennsylvania-Deitschland, wie i sell nenne duh! Danke für Dei schöne Üwersetzung vun “Yankee Doodle” od’r soll i v’leichd sell as Jankih Dudl schreiwwe (Schmunzel). Die deitsche Orthographie isch net so leicht, d.h. we’ma uff Mundart schreiwe will. Awwer wenn’s so leicht wär, däht ma’s wohl net so sehr schätze! B’häwwigkeet führt manichmol zur Faulheet hin, gell net?
Doug, nomols beschde Dank für Dei Arweet mit d’r hochdeitsche Sprooch un au der Mundart. Du ahnscht glauww‘ i net, wieviel Freude Du uns bringscht! Schönschde Grüsse (unbekannterweise) a‘ Dei liewwe Frau, an Estella un au Oscar—so schöne Kinnerle, un i wünsch au Gottes Segne a‘ Dei ganze Familie.
Mit viele Sommergrüsse un Wünsche für weiterhin besten Erfolg und Spass in allem, was Sie da unternehmen
Bin I
Dei
Jim (Jakob) Kramer
(seller Pittsburgher Kerl)