En Gschwetzt mit dem Punxsutawney Phil!

Guder Daag Blog Leser! As viel vun eich schunn wisst, Dinschdaag, der zwette Hanning, iss en abaddicher Daag fer uns Deitsche un fer en gleene Schteddel in Naddwescht Pennsylvaania. Ya, Dinschdaag iss Grundsaudaag. Frieh am Mariye in Punxsatawney, der Phil, die gut bekannte Grundsau, waerr aus sei Loch rauskumme un saag uns sei Wedder Vorherrsaage. All die Media, mit viel Kameras, waerre aa datt sei um ihn zu sehne. Er iss warricklich so en Celebrity. Eb ee paar Woch hawwich die Leit in Punxsatawny gschriwwe ob ich der Phil interviewe kennt. Zum Glick hen sie “YA” gsaat, un selles Woch hawwich via Cell Phone en Interview mit dem Phil ghatt. Do iss was mir driwwe gschwetzt hen:

Guder Mariye Phil! Ich bin so froh mit dir zu schwetze. Loss mich so aafange: wie waar dei Winderschlof?

Ya, guder Mariye! ‘Sis en grosse Blessier mit dir aa zu schwetze! Ich les dei Blog un gleicht es aarig viel. Ya, mei Winderschloof waar gut awwer wie immer, zu katz. Bevor ich in mei Loch gegraddelt bin, hawwich en grosse Party mit all mei Freinde ghatt, wie immer. Mir hen gedanst un gut gesse un vielleicht hawwich glee bissel zu viel Bier gedrunke. Awwer wie ich es seh, iss sell gut. Wann ich glee bissel zu viel drinke, dann kann ich gut schlofe! En grosse Fan aus Lebanon hot mir letschdes Yaahr en scheener Blaenket genaeht un hot es zu mir zerick in Oktower gschickt. Ich hab sell des Winder geyuust un man es waar warm. So ich muss Gross Dank an die Verna Kellerfeich saage!

Letschdes Yaahr hot dir Recht ghatt. Congrats, awwer was saagscht du zu re Leit die saage: “Der weess gar net was er duht.”

Was kann ich saage? Es waerr allsfatt Unglaawiger gewwe. Ich kann duhe yuscht was ich duhe kannscht. Ich saag es Wedder wie ich es finne. Wann Leit denke as ich dumm bin odder as ich net
weess was ich saage, so iss es. Ich weess as es gebt viel Leit die nemme was ich saage as die Waahrheit un sell iss gut genunk fer mich. Ich daet aa saage as die Leit die net glaawe, sie sin arrig Willkumm dohie zu kumme un mei Tschopp fer ee Yaahr mache. ‘Sis net leicht! Awwer die waerre sell net aa duh. Manniche Leit gleiche yuscht zu grexe. So iss es un so waerr es allsfatt sei!

Was denkscht du vun all die Science as mir nau hawwe fer Wedder vorherrzusaage?

Ya, dihr Mensche sin arrig weit mit Technology kumme. Awwer, mannichmol sin die alde Wege graad so gut, wann aa net besser, as die neie Wege, gell? Ich brauch ken Radar odder Digital Kaarte fer mei Tschopp zu duhe. Ich kann mei Antwatt in mei Gnoche fiehle….un mer soll unser Gnoche net iwwergucke. Dihr hett viel Technology, awwer ich froog eich: mache die Weddermannsleit ab un zu Fehler? Fer dausend vun Yaahre hemmer soddiche Technology net gewwe un mir hen iwwerlebt.

Hoscht du Blanne fer der Summer?

Well, ich hoff so. Die Fraa will uff en Cruise geh. Fer die letsche paar Yaahre hawwich Commercials fer die Pennsylvaania Lottery gemacht. Sie hen mich zimmlich gut dafer bezahlt. So ich denk ‘sis Zeit ee paar Dallers auszugewwe. Im Moi gehne mir nooch Florida un dann uff en grosse Boot in die Caribbean fer 10 Daage! Dann in Tschulei will ich mei Cousin in Nadd Dakota bsuche. Er wuhnt net so weit Weg vun en grosse Schteddel vun Prarie Dogs. In Tschulei gebt es en grosse Myusik Fescht datt un ich will es sehne. Mei Cousin saagt yedes Yaahr as ich datthie gehne soll, so endlich des Yaahr duh ich. Es soll gut sei, awwer sell iss en langi Faahrt.

Du bischt en Symbol fer Pennsylvaania un aa fer uns Deitsche, wie fiehlscht du dich iwwer sell?

Ya, ich bin. Weesscht du, am Dinschdaag wann ich rauskumme ‘sis wie en Blitzschtaerm! Ich fiehl mich as ich uff der rote Karebet bei de Oscars bin. All die Kameras waerre am blitze sei un Leit waerre greische: “Phil, Phil, Phil! Mir liewe dich Phil! Guck mol do, Phil!” ‘Sis warricklich eppes. Awwer, Doug, loss mich des saage: ich bin yuscht en Grundsau aus Pennsylvaania. Ich duh mei Hosse aa ee Beh uff ee mol. Ich bin net anners vun eich. Ich duh mei Tschopp un am End es Daag bin ich graad wie all die annere Grundsei, un ich bin OK mit sell. Wann ich Fried zu alde un yunge Leit bringe, sell find ich gut.

Kannscht du aa en Vorherrsaage fer Bresident in 2016 gewwe?

HA! Ich hab viel davun gheert! Ich waerr ken Vorherrsaage fer November saage, awwer ich kann saage as dem Donald Trump sei Haar, guckt graad wie en Exfraa vun mir. Sell waar net en gude Relationschip, so ich hoff as er net gewinnt, schunscht muss ich an sie denke yedes Mol as er uff em Guckbax kummt!

Gross Dank Phil fer des Interview. Es waar en grosse Blessier mit dir zu schwetze. Ich winsch dir Gut Glick fer Dinschdaag! Bevor ich geh, soll ich mei Schneeschipp wegduh odder raus losse?

Doug, du musscht bis Dinschdaag fer selle Antwatt waarde!