Guder Daag Blog Leser! Es macht nix aus wann du gebore waarscht, yeder Paerson hot en Schtanne-Zeeche. Astrology iss arrig popular mit viel Leit. Sie lese ihr Horoscope yede Daag in der Zeiding odder Online. Annere Leit lese es yuscht fer en Lach. Fer die Leit die warricklich an die Schtanne-Zeeche glaawe, iss es wie en Relichion. Paersehnlich, find ich die Schtanne-Zeeche gschpassich zu lese. Des Woch will ich die Schtanne-Zeeche un ihr Deitsche Naame, wann in em Yaahr es iss, un weller Kareberdeel es verdredet gewwe. Ich geb aa en katze Beschreiwung iwwer was en dybical Paerson fer yede Schtanne-Zeeche sei soll.
Schteebock (Diesember 22 – Yenner 19) – Der Schteebock der tschumpt – die Gnie – Schteebock sin antwattlich, geduldig, ehrgeizich, ehrlich, hot viel Glick un sin arrig gutmiedich.
Wasserman (Yenner 20 – Hanning 18) – Der Wasserman giesst – die Beh – Wassermenner sin witzig, gscheidt, menschlich, erfinnlich, original, oft verschpaet un arrig freindlich.
Der Fisch (Hanning 19 – Matz 20) – Der Fisch schwimmt – die Fiess – Fische sin mitleidich, eirichdich, aanemmlich, ergewwlich, un eibildich. Sie kenne en Geheemnis net behalde un sie kenne net Nee saage.
Der Widder (Matz 21 – Abrill 19) – Der Widder gebt schtees – es Kopp un Gfress – Widder sin unabhaengig, grosshatzich, optimistisch, mudich, unatwattlich mit ihre Waricke, resolutt, un sie gleiche net zu verliere.
Der Schtier (Abrill 20 – Moi 20) – Der Schtier der schpringt – der Hals – Schtiere sin zuverlossig, ausschtickig, gedreilich, geduldig, grosshatzich, un schtoppkeppich. Was du sehnscht iss was du grickscht mit Schtiere. Sie glieche Blumme un Myusick.
Zwilling (Moi 21 – Tschunn 21) – Die Zwilling sin bees – die Arem – Zwilling sin safdich, gscheidt, eibildisch, un witzig. Sie bleiwe yung un sin arrig blauderich.
Der Grebs (Tschunn 22 – Tschulei 22) – Der Grebs der glemt – die Bruscht – Grebs (sell iss was ich bin) sin gedreilich, zuverlossig, un achtgewwlich. Sie hen gude Gedechtnisse, sie liewe Gschicht. Sie gleiche Dinge zu sammele. Sie gleiche zu reese awwer aa heem zu kumme.
Der Leeb (Tschulei 23 – Aagscht 22) – Der Leeb der brillt – der Hatz – Leewe sin verdraulich, ehrgeizich, grosshatzlich, schtolz, un zuverlossig. Sie sin oft greeser as Lewe.
Die Blummefraa / die Yungfraa (Aagscht 23 – September 22) – Die Yungfraa die schwetzt – die Kuddel – Blummefraa sin analytisch, bedrachlich, hilfreich, rechschaffich, un bleed. Sie mache Freinde langsam.
Die Woog (September 23 – Oktower 22) – Die Wooge die gilt – der Zaam – Wooge sin diplomatisch, aamutig, friedlich, gaschtfreindlich, un unentschlosse. Sie liewe die Liewe un aa gudes Esse.
Der Skorpion (Oktower 23 – November 21) – Der Skorpion schticht – es Becke – Skorpione sin gedreihlich, schpielich, bedrachlich, un gutguckich. Sie kenne arrig eifersichdich sei un sie saage es wie es iss.
Der Schitz (November 22 – Diesember 21) – Der Schitz der schiesst – der Schenkel – Schitze sin unabhaengig, mitaus Gefiehl, hattschaffig, freindlich, un ehrlich. Sie gleiche zu reese un Geld auszugewwe.
So do sin sie, die 12 Schtanne-Zeeche. Iss was ich gschriwwe hab recht fer dich un dei Schtanne-Zeeche?
Do iss en Audioklip:
PA Dutch 101 