Willkumm 2016!

Guder Daag Blog Leser un willkumm im Yaahr 2016 odder ass die Roman Leit saage daete: MMXVI. Well, nau sin mir widder in en Neies Yaahr. Viel iss in 2015 gschehe un ich weess as viel in 2016 aa gschehe waerre. Was waerre gschehe iss nooch in die Luft. Fer mei aerschde Blog Poscht fer es Yaahr hawwich gedenkt ass ich en katze Lischt vun wichdige Yaehrlichfeschte fer es Yaahr 2016 gewwe waerrd.

2016 iss es 500. Yaehrlichfescht vun dem Reinheitsgebot in Deitschland. Ich gleich Bier net yuscht zu drinke awwer aa zu braue. So es Gebot iss arrig wichdig. Es Recht iss die Regel fer wie mer Bier in Deitschland braue misse. Alle Biere misse yuscht Wasser, Gerscht, un Hoppe hawwe. In Deitschland, selles Recht iss nooch am laafe.

‘Sis es 450. Yaehrlichfescht vun dem Nostradamus sei Dod. Der Nostradamus waar en Mann der in die Zukumft sehne kennt. Er hot viel gschriwwe iwwer was gschehe waerre. Viel Leit glaawe nooch an was er gsaat hot.

‘Sis es 400. Yaehrlichfescht vun dem William Shakespeare sei Dod. Was kann ich iwwer der Bard schreiwe? Er waar der Bescht. So viel vun was mir wisse iwwer es Englische Schprooch un Literature kummt vun der William. Viel vun uns kenne saage as mir in die High Schul glee bissel Shakespeare lese gemisst hen.

‘Sis es 350. Yaehrlichfescht vun em Grosse Feier vun London. In September 1666 en Feier iss in London aagfange in Pudding Lane in en Beckerei. Es Feier hot fer 3 Daage gebrannt un meh as 13,000 Heiser, 87 Karriche un Sankt Paul sei Cathedral sin verdilgt. Meh as 70,000 Leit waare mitaus en Blatz zu wuhne.

200 Yaahre zerick hot die Mary Shelley ihr gut bekanntes Buch Frankenstein gschriwwe. Mir alle kenne die Gschicht arrig gut vun dem Doktor Frankenstein un sei Winsch en Monschter vun Schticke vun dode Leit lewendig zu mache. Mit Glick un en Wedderleech iss es bassiert!

Im 1866, 150 Yaahre zerick waar die American Society for the Prevention of Cruelty to Animals (ASPCA) in Nei Yarrick Schtadt gegrindt. Die Society iss nooch in Business un sie schaffe allsfatt nooch fer all die Gediere in re Welt un ihr Gsundheit.

‘Sis es 100. Yaehrlichfescht vun vier Dinge. Es Yaahr 1916 hot viel gsehne. Mir waare nooch im Aerschde Welt Grieg in Europe. Awwer do in Amerikaa waar es National Park System gegrindt. Selles System iss antwattlich fer all die National Parks, Battlefields un Monuments. Was waerr Amerikaa mitaus Yellowstone, Yosemite odder Gettysburg? NIX! Es System iss arrig wichdig un ich hoff as es waerr allsfatt en Schtick vun unserem Land sei. In Hollywood, der Charlie Chaplin hot sei aerschde Movie Contract unnegschriwwe. Mir wisse wie wichdig sell waar. Der Chaplin hot so viele gude Movies gemacht in die Yaahr nooch 1916. Die Boy Scouts vun Amerikaa sin aa 100 Yaahre alt des Yaahr.

Un Letscht awwer net am wennichschten, 2016 iss es 75. Yaehrlichfescht vun em Aagriff an Pearl Harbor vun de Tschapanese. Der Aagriff waar der Aafang vun der Zwette Welt Grieg fer uns Amerikaaner.

Ich weess net was in des Yaahr gschehe waerr awwer ich hoff ass es Yaahr eich viel Glick, Gsundheit, un Gedeiheit bringt!

Do iss en Audio Klip: