Guder Daag Blog Leser! Well ich hoff as alle vun eich en gude Danksfescht ghatt hett. Mei waar gut un nadierlich hawwich zu viel gesse! Alles waar so appeditlich. Dann bin ich in der Busch gange um en Hasch zu schiesse, awwer sell waar nix so gut gange. Ich hab ken gsehne! Nau sin mir schunn in Diesember un sell meehnt as es widder Advent iss.
Der Advent iss die Zeit in em Karrichyaahr bevor dem Grischtdaag. Der Advent iss en Zeit fer die Leit zu rischde un waarde fer em Yesus sei Gebott uff em Grischtdaag. ‘Sis aa em neien Karrichyaahr sei Aafgang.
Die Zeitlaaf kann mit em Adventkalenner gezaehlt. Des iss en Iewing die vun Hochdeitsche Ludderaaner geintroduced waar. Der Advent faangt uff em viert Sunndaag var Diesember 25th aa. Es gebt allsfatt vier Sunndaage in Advent. Viel Leit hen aa en Adventsgranz mit vier burbel Kerze un en rosa Kerz in em Mitt.
In em Latin Schprooch heesst es Adventus, un sell kummt vun em Griesche Watt parousia, sell waar normally fer die Zwette Kumme vun Grischt geyuust. Fer Grischde, der Advent iss en Denkseckli fer allebeed die Waardezeit vun em Hebrews fer es Gebott vun ihrem Erlesser un aa fer die Waardezeit vun Grischde fer em Grischt sei Zerrickkum.
Die Lesungen un die Laerne darich der Advent iss eft uff der Zwette Kumme zu rischde un aa uff der aerschde Kumme vun Grischt aazudenke. Sei aerschde Kumme iss er as Erlesser kumme, un sei zwette Kumme waerd er as Richder kumme.
En dypical Karrichlied fer die Adventzeit is O Kumm O Kumm Emanuel. Ich hab gedenkt es waer schee wann ich die aerschde Vaersch ins Deitsch iwwersetz, so do iss es:
O Kumm O Kumm Emanuel
Un errede gfangene Israel
Die do drauere in leedmiedichliche Exil
Bis em Gott sei Soh scheint
Frehe! Frehe! Emmanuel
Soll zu dir kumm, O Israel.
Do iss en Audio Klip:
PA Dutch 101 
Schaade, ass du kee Haasch gesehne hascht! Awwer der Sport heesst Yaage un nit Fange, gell? Kumm O Kumm Emmanuel singmer ieder Adventsunndaag in insre Karrich, danke fier die PADeitschiewwersetzing.
Hallo liewwer Doug,
Nu, wie d’r Herr Speese so schö’ g’saat bzw g’schriewwe hot, isch d’Jagd net d’r Fang am Wichdigschde, gell?! I hoff’ ja, sell isch doch e schöner Daag g’wä. Wie ma‘ no drüwwe in d’r alde Heemat no saage duht, „mer kumme viel zu selde `naus in Gottes freie Natur.“
I hoff‘, es gaht Di un Dei Liewwe all‘ nur beschdens, un i ka‘ mi vorstelle, die Estelle duht sich scho uff Weihnachde freue, gell net? Wunnerbar isch’s ja, wu ma Kinderle hot, i ka‘ mi no erinnere, wie mei Nichde un Neffe alle so glee g’wä senn. Jetztle hän se `re eeg’ne Kinderle, so gaht’s ja weiter!!
Im voraus wünsch‘ i Di un Dei ganze Familie ein frohes Weihnachtsfest, ein gesundes, glückliches neues Jahr, und alles Gute für Leib und Seele! (Sell klingt besser glaub i uff Hochdeitsch!)
Mit schönschde Winter-un vorweihnachtliche Grüsse aus’m „Groβstädtle zum Weschde”
Bin i
Dei
Jim (Jakob) Kramer
(Seller Pittsburgher Kerl)
Reblogged this on PA Dutch 101 and commented:
‘Sis widder die Adventzeit! Do iss en alde Poscht die ich frieher gschriwwe hab. Viel Gschpass bei lese!
Ich kann leider noch nicht auf PA Deitsch schreiben, aber ich kann mittlerweile fast alles verstehen. Ich schaue auch deine YouTube Videos.