Geschder bin ich uffwacker, un es waar mir glee bissel kiehl im Haus. Ich bin nausgange fer meie Zeiding zu griege, un ich hab Acht uff de Bledder ghatt. Sie waare rot, gehl un aarensch. Sell muss schunn Schpotyaahr sei. Ich gleich Schpotyaahr arrig viel. Ich weess net ob es mei Leiblingsyaahreszeit is odder net, awwer ich gleich es.
In em Nummidaag hawwich viel draus in mei Hof geduh. Ich hab mei Graas gemaeht. Ich hoff as sell waar die letschde Mol fer es Yaahr, awwer yuscht mol sehne! Nooch em Graasmaehe, hab ich Bledder vun meine Maebel- un Eechebaam uffgepickt. Es hot net so viel gewwe…die Beem sin nooch voll, awwer ee paar sin schunn nunnerkumme. As ich mit de Bledder am schaffe waar, hawwich die sunderbaare Geruch groche. Die Bledder in Schpotyaahr hen ihr eegne Geruch…un es is siess zu meinre Naas.
As ich faddig mit meine Bledder waar, hawwich in im Blummeland geschafft. Ich hab vier Grisanthymums gkaaft. Die waare arrig voll mit Blumme un sie waare so farewevoll. Ich hab die newwe em Haus geblanst. Ich hab aa ee paar Dullebaane, Oschderblumme un Krokuses geblanst. Ich hoff as die in Friehyaahr uffkumme! Yuscht mol sehne!
Schpotyaahr is aa die Zeit fer Ebbel, Ebbelseider un Karebse. Kiehler Owede un sonnige Daage…die sin so schee, Gell? Nau is aa die Zeit fer die Kinner uff ihre Spuckowed Koschtume zu denke. Ich hab aa en Idea ghatt fer Spuckowed. Ich waerr meh iwwer sell schpaeder schreiwe. Ich hoff as alle vun eich aa Schpotyaahr gaarn hawwe. Schreib mich en Comment un loss mich mol wisse fer was dihr Schpotyaahr gleicht!
Un nooch eppes: Letschde Woch is alles uff meinre Hochzich gut glaafe! Es Wedder waar wunnerbaar un mir hen ken Probleme ghatt!
Do is en Audioklip: Es muss Schpotyaar sei!
PA Dutch 101 
Ich gleich die Monarchschmetterlinge (fledermeis?). Leider giwwt’s nimmer so viel weil’s wennicher Futterblaanze fer die Raupen zu fresse giwwt. Awwer ganz ehrlich g’satt iss mir as Friehyaar viel liewwer als ‘as Schpootyaahr. Nach’m Schpootyaahr kummt der Winder! Un ich gleich Winder nit! Bin g’schpannt zu wisse, was fer een Koschtum du fer Spuckowed a’ziehe duscht!
Hallo liewwer Doug!
Hier im Weschde senn die Blätterle no net ganz bunt—awwer I glaub’ scho, in ‘re Woch’ sehne mer die schöne Farwwe. D’r Summer isch zu g’schwind v’rlaufe, un i bi‘ net grad b’geischdert, dass mer bal‘ wied’r Kälde un Schnee b’komme werde. I hab‘ in `r Zeetung g’lese, dass die Blätterle dieses Johr ganz spoot bunt werde, un sell soll doherkumme, weil’s so viel g’regnet hot. Nu, so gaht’s, gell net?!
I hoff‘ ja, es gaht Di un Dei Liewwe all‘ nur beschdens, un‘ i hoff, däs Schuljohr gut b’gonne hot. I wünsch‘ Di, Dei liewwe Ehefraa, Dei Töchderle Estella un Söhnle Oscar „Vum Gute nur’s Allerbeschde!“
Mit schönschde Herbschdgrüsse aus’m Weschde vun Pennsylvania
Dei
Jim (Jakob) Kramer
(Seller Pittsburgher Kerl)
Hallo liewwer Herr Jack Spees,
I gleene Randbemerkung: e Fledermaus isch net e Schmetterling od’r e Falter (in Deitschland hot’s so wunnerscheene Nachtfalter g’ewe–se senn e bissele anderschd wie die Motten od’r Schmetterlinge, se senn wirkli bunt!), e Fledermaus isch uff Englisch e Bat–also e ganz anderes Tierle!
Scheenschde schwäbisch-Badische Grüsse aus’m Groβstädtele zum Weschde vun Landkreis Lancaster,
Jim (Jakob) Kramer
[seller Pittsburgher Kerl]
Oh oh–Doug, du hosch vun e Hochzich g’schriewwe–awwer wer hot sich g’traut? Bin ja e bissele “wunnerfitzich” beziehungsweise wissb’gierig (ma hot mi g’saat, heitzigsdaags duht ma net meh “neigierig” saage!!!)
Nu, nomols scheenschde schwäbisch-Badische Grüsse un Gratuliere!!!
Jim (Jakob) Kramer
[du woissch no wer, gell net? 🙂 ]