Guder Daag Blog Leser! Ich weess net warricklich wie mer aafange soll. Mit en Title wie sell, kann ich viel schreiwe. As viel vun eich schunn wisst, hemmer do in Amerikaa en grosse Lecktion im November 2016. Dann waerre mir en neie Bresident waehle. Die Leit die es Tschopp hawwe welle sin schunn uff em Rutsch fer unsere Schtimme. Ya, meh as en Yaahr weck un es iss alles was mir heere, lese, sehne. Was ich gaar net verschtehe kann iss wie selle Leit sich benemme.
Die grosse Schlacht nau iss fer die Republican Nomination. Es gebt 14 Leit die es welle. Ee paar sin arrig gut bekannt. All ausser een sin weiss, all ausser drei sin schunn Bolitiker un all sin reich. Un was arrig schlecht iss, iss as nimmi Deitsch sin. Es gebt ee paar die ganz weit in die Polls vannedraa sin: der Donald Trump, der Jeb Bush, der Ben Carson un die Carly Fiorina. Ya, es gebt ee Fraa! Letschde Woch hot es en Prime Time Debate gewwe. Fer drei Schtunne hen sie mitenanner gefochde. Sie en enanner veraarscht. Sie hen yuscht gyacht. Der Moderator hen Frooge iwwer Current Events, iwwer Bolitikal Gedenke, iwwer Taxe un viel annere Dinge gfroogt awwer die Leit hen gaar ken echde Antwadde gewwe. Sie hen yuscht iwwer die annere Leit gschwetzt odder iwwer sich selwer gschwetzt. Ich kennt yuscht fer ee Schtunn gucke, dann hawwich genunk ghatt un bin ins Bett gange. Oft hawwich yuscht mei Kopp gschiddelt. Ich waar uff mei Land gschemmt. Ich weess net wie es naegschdes Yaahr gehe waerr. Awwer ich hoff as am End waerr unser Land en guder Mann odder Fraa fer es Tschopp hawwe waerrd.
Nau sell iss die Lecktion fer 2016, fer sell kenne mir yuscht waehle. Awwer in 2020, iss es en annere Gschicht! Ich hab lang un hatt iwwer sell gedenkt un ich denk es iss Zeit fer uns en Deitscher in em Weiss Haus zu hawwe. So, mit arrig viel Schtolz kann ich sell saage: Ich schmeiss mei Hut in der Ring fer Bresident im Yaahr 2020! Ich glaab ich kann so en guder Tschopp duhe wie ennich epper. Ich waar uff en Bauerei uffgwaxse: ich weess was Arewet iss. Mei Familye hot mich Schparsaamkeit gelehrt. Ich kann mit normal, middle-class Leit schwetze. Ich bin en Schulmeeschder, ich weess wie mer sich mit schlechte, dumme Leit schaffe muss.
Ich hab schunn en Facebook Seit fer mei Campaign: Madenford2020
Was denkt eich? Iss es Zeit fer en Deitscher Bresident zu sei?
Do iss en Audio Klip: Bolitiks in Amerikaa
PA Dutch 101 
Wann ich noch doh bin in2020, ich duh gern fa dicch schtimme!
Liewwer Doug,
I glaub’ ‘sisch schee wu ma dra’ denkt, annere Leit z’helfe. I bi‘ awwer üwwerzeugt, dass ma‘ heitzigsdaags Millionär sei muss, um als Präsident ins Weisse Häusele z’kumme. So isch’s halt in d’r Welt vun heit. George Washington od’r gar Abraham Lincoln hätte koi Chance!
Nu, wenn Du wirkli ernschd bischt, ka‘ i nur saage: s’wär ratsam, wenn Du di mit Millionäre od’r Milliardäre a’freinde dätscht, nur so kummsch Du ins weisse Häusele. Un i bitt Di: schaff doch die Regeboge Lichder weg—keener hot e G’legeheet g’hat, ja od’r nee z’sage—d’r Präsidend Obama hot se mir nix dir nix ei’gführt, un i muss saage: `sisch’s WEISSE Haus, net’s Regeboge Hüttle!!
Schönschde Herbschdgrüsse aus’m Groβstadt zum Weschde
Schickt Di, Dei liewwe Frau, sowie au die Kindele Estella un Oscar
Dei
Jim (Jakob) Kramer
[Nomols seller Pittsburgher Kerl]