Des iss meim Daadi sei Welt!

Guder Daag Blog Leser! Ich bin net Gadolisch awwer wann der Baapscht, der Francis, eppes saagt, normally heer ich vun sell. Frieher im Yaahr hot der Francis gsaat as der 1. September soll en Daag vun Bede fer Achtgewwe vun der Erschaffing sei. Ich denk as unsere Welt braucht viel Bede. Mir, as Mensche, sin net allsfatt die beschde Achtgewwer fer unsre Aerd. Awwer ich muss saage as uns Deitsche sin vielleicht glee bissel besser Achtgewwer as annere Druppe vun Leit. Viele vun uns sin Bauere. Die Bauere wisse wie wichdig die Gsundheit vun der Aerd iss. Awwer, drauerlich, gebt es viele viele Leit die net gut Achtgewwer sin. Die grosse Eel Kumpanis mache viel Dreck uff em Grund un unnich em Grund. Oft schmeisse Leit Chemicals in unsere Rewwers un in die Oceans. Es gebt yuscht ee Welt, mir misse besser achtgewwe. So ich saag YA zu dem Baapscht sei Aaruf fer Bede.

Es gebt en arrig gut bekanntes Lied, es heescht “Sell iss meim Daadi sei Welt.” Vielleicht kennt dihr des Lied schunn. Es schwetzt vun unsere Welt un wie mir uff es Lewe solle. Ich hab gedenkt as in Ehr vun Dinschdaag un der Daag vun Bede fer Achtgewwe vun der Erschaffing, waerr ich selles Lied ins Deitsch iwwersetze.

Des iss meim Daadi sei Welt – vun dem Maltbie Babcock, 1901

Des iss meim Daadi sei Welt,

un zu mei heeriche Ohre,

All Nadur singt, un um mich ringt

Die Myusick vun de Spheres.

Des iss meim Daadi sei Welt:

Ich ruhg mich in es Gedenk

Vun Schtee un Beem, vun Himmel un See;

Sei Hend die Wunner hen gschafft.

————————————————

Des iss meim Daadi sei Welt,

Die Veggel ihre Lieder nuffmache,

Es Mariyelicht, die Moiblumm weiss,

Saage ihre Macher sei Lob.

Des iss meim Daadi sei Welt:

Er scheint in all was schee iss;

In dem rapplene Graass, ich heer ihm vorbeigeh;

Er schwetzt zu mir iwwerall.

———————————————-

Des iss meim Daadi sei Welt.

O, loss mich nimme vergesse,

Es Gedenk vun Letz iss oft arrig schtarrick,

Der Gott iss nooch der Herrscher.

Des iss meim Daadi sei Welt:

Ferwas soll mei Hatz drauerich sei?

Der Herr iss Keenich; loss die Himmel ringe!

Der Gott regiert; loss die Aerd froh sei!

———————————————-

Do iss en Link fer die Melodie vun sellem Lied zu heere: Des iss meim Daadi sei Welt

Ich hoff as uff em Dinschdaag dihr aa kennt ee paar Minudde nemme um uff unsere Aerd zu denke un bede.

Do iss en Audio Klip: Sell iss meim Daadi sei Welt