Guder Daag Blog Leser! Heit waar ich am Kaffi drinke un mei Zeiding am lese un ich hab des Gschicht gelese. Ich hab es glee bissel luschdich gfunne un hab gedenkt as ich es fer eich iwwersetze daet. Fer die Leit die net wisse, Penn State University iss die greeschte University in Pennsylvaania. Sie hen baut 40,000 Undergraduates, 20,000 Graduates un meh in ihr World Campus Program. Mer daet denke as sie viele Brobleme hawwe misse mit so viel Leit uff ihr Campus. Awwer selle Woch sin die Schtudente net es Broblem, die Dauwe sin! Do iss en Iwwersetzung vun der Ardickel aus The Centre Daily Times:
Oh Mischt!
Nooch en Wooch mit annere Brobleme uff em Campus un aa en Feier in die Hammond Building, Penn State hot nooch uff en annere Gebei am Mittwoch ghatt zu baddere. Die Nittany Parking Deck hot en Schild: “Parkblatz iss zu.” So was waar letz? Schlechte Macadam? Hochwasser?
Nee, Dauwe.
Wann Veggel vun de gleiche Fedder zamme scheisse, kann sell en grosse Broblem mache.
Die Susan Bedsworth vun dem Office of Physical Plant (OPP) hot gsaat: “‘Sis net so schlimm wie en Alfred Hitchcock Movie, awwer die Veggel hen so viel Mischt gemacht as mir es Parkblatz zumache misse bis alles sauwer gemacht iss.”
Die Bedsworth hot gsaat as Parking Officials hen Servpro die Tschopp gewwe all die Dauwe Mischt weckzunemme. “Ich glaab es waerr zu bleiwe bis alles widder besser iss,” hot sie gsaat.
Die University waerr aa en Pest Management Company, Orkin, die Tschopp gewwe, um so en annere Broblem net in die Zukunft bassiere waerr.
Des iss net es aerschdes Mol as die Penn State Brobleme mit Veggel ghatt hot. Ee paar Yaahre zerick dausende vun Grappe hen uff em Shortlidge Schtross in de Beem ghockt. Sie hen aa en “Unsanitary Situation” gemacht.
Hoffetlich kenne die Leit an PSU es Broblem verbessere. Dauwe sin net so gross awwer sie kenne viel Mischt mache. ‘Sis allsfatt so, die gleenere es Kind iss, die lauter es iss…….
Do iss en Audio Klip: PSU hot en Broblem
rh=1#storylink=cpy
PA Dutch 101 
Aff mei Universitaet hemmer aa selles Broblem mit Dauwwen g’hatt. Sie duhn gern ihre Nests uff alden Gebei baue, ferschur. Un mei Universitaet Cornell hot viele alde Gebei, die wunnerscheene Nestblatze fer Dauwwe hen. Ich gewwe zu, sie kenne manchmols alles vollscheisse, awwer richtig g’pflegt un sauber g’halte sinn Dauwwe aa arrig scheene Diere. Aff’m State Fair gewwt’s viele scheene Dauwwe zu sehne. Fer Leit die in Schettln wunne, wu sie kee Hinkel hawwe kenne, sinn Dauwwen eene Meeglichkeit.
Liewer Doug,
I schaff‘ nämlich in d’r Stadtmitte, un mei, do gibt’s awwer au viele Däuwele! Du sollsch emol sehe, wie se schier en’n a’greife, we’ma sei Middaagesse esse möcht‘!!! Friede fliegt wie sie scho weg!!
Manichmol nehm‘ i e bissele extra Brot mit, awwer net für selle grosse Fresserle—wirkli für die liewe gleene Spatze (v’rgleenert heesse sie bei uns „Spätzele“—g’nau wie die liewe Nudele!!! ). Schmeiss i awwer e handvoll Bröckele hi‘, no komme scho die gleene—g’folgt vun dene grosse!! Sell isch wirkli eppes!
Ma hot mi emol v’rzählt, wie vor jetzle gut 20 Johre od’r no mehr ma die St. Pauls Kathedrale in Oakland ausserhalb vun Pittsburgh g’reinigt hot. Au weh—i weess nimme, was schlimmer g’wä isch: d’r Dauwemischt od’r seller vun dene Fledermäus‘!! Haufeweis hot ma’s vun drowe `rausg’trage, un die Glöckle hot ma extra putze müsse.
I glaub‘ ja, in Europa hot ma’s gleiche Broblem, weil i wu g’lese hab‘, die amerikanische Däuwele seie die Noochkumme vun europäische Vögele! I wees, die Spatze (od’r uff gut Deutsch, die Sperlinge) senn die Noochkumme vun „Engländerle“—ma hot se ei’g’führt, um Insekte zu b’kämpfe od’r so eppes.
I hab‘ e DVD vun Frau Dolly Parton, un i g’stehe hier ei‘, mi duht se als Unterhaltung recht gut g’falle (als junger Mann bin i anderthalb Johre in Tennessee uff eeher Bible-College net weit vun Dollys Zuhäusele entfernt g’wä). Se v’rzählt dervo‘, wie ma ihr zur Ehre e grosse Statue in d’r Stadtmitte drunne uffg’richtet hot. Se isch so stolz d’ruff g’wä un hot so lang g’schwätzt, dass ihr Vadd’r soll g’saat hän, däs sei IHR eppes grosses, awwer dene Däuwele gelte die Statue bloss als „Outhouse!!!“
(Später soll die Dolly g’hört hän, dass ihr Vadd’r schier jeden Daag dorthi‘ gange sei un dass er die Statue mit Seif un Wasser g’putzt hot!!! Er isch au stolz uff sei Döchterle g’wä, un se hot g’saat, na, das isch doch eppes, was e Daddy halt mache dät!!!).
I weess, manichmol schreib‘ i e bissele viel. I sag awwer, ee’mol wirsch au alt, un die G’schichte, die ma‘ g’hört hot, sin manichmol däs, was am Ende doch am Wertvollschde isch, gell net?
Mit schönschde sommergrüsse un in d’r Hoffnung, dass Du, Dei liewe Fraa un die Kinner noch viel Spass un Freud am Sommer g’niesse werdt!!
Dei
Jim (Jakob) Kramer
Seller Pittsburgher Kerl