Guder Daag Blog Leser! Des Woch hawwich en Nei-ichkeede Gschicht im Guckbax gsehne. Die Poconos (en Gegend in Nadd-Oscht Pennsylvaania) hen en Blann. Sie wolle Hochdeitsche Leit eilaade. Die Idea iss ass die Poconos en Reesziel fer Hochdeitsche sette sei. Die Commercial saagt as es gebt viel in de Barriye zu duh, viel in de gleene Schteddel zu seh un viel zu erfaahre. Die Commerical waar alles uff Hochdeitsch gemacht un waerr in Hochdeitsche Guckbaxe schpiele.
Do iss en Link zu der Commercial: Die Poconos Commercial
Ich finn des en arrig guti Idea. Awwer ich hab en bessere Idea. Ich denk as Pennsylvaanisch Deitschland soll aa so en Commercial mache. Unser Gegend iss fer schurr en Reesziel fer Hochdeitsche! Denk mol nooch: es gebt unser Schprooch, alde Esse vun dem alde Land, alde Architechture un aa unsere Deitsche Kuldur! Hochdeitsche kenne do kumme um vielleicht alde Freindschaft zu finne. Sie kenne iwwer uns lanne. Pennsylvaanisch Deitschland guckt viel wie der Palz aus, die Hochdeitsche waerre da heem fiehle.
Die Pennsylvaanische Regiering iss arrig dumm wann sie so was net duht. Ich hab oft vun Hochdeitsche im Internet gheert die nooch Pennsylvaania reese wolle. Viel devun sin schunn dohie kumme. Wann sie mich zum aerschde Mol schreiwe, geb ich sie viel Bletze zu seh. Sie sin allsfatt eiferich dohie zu kumme, unsere Schprooch zu heere, die Hex Signs zu seh, Amisch Leit zu dreffe unser Esse zu browiere. Ich denk as mir hocke uns uff en Goldgrube!
Viele Amerikaaner fliege nooch Deitschland um es Land vun ihre Voreldre zu seh. Mir fliege datt un gewwe viel Geld aus. Mir bleiwe in Hotels, esse in Essbletz, kaafe Souveniers un so weider. Die Hochdeitsche waerre so was aa do duhne wann sie kumme!
Was denkt dihr? Soll Pennsylvaanisch Deitschland so was mache? Solle mir Pennsylvaanisch Deitschland en Reesziel fer Hochdeitsche mache? Ich saag YA!
Do iss en Audio Klip: PA as en Reesziel
PA Dutch 101 
Arrig guti Idea, Doug. Ich bin selwwer mit een hochdeitsches Ehepaar email-befreindet, die die USA as Reesziel arrig gern hen. Florida iss bereits een beliebtes Reesziel fer Hochdeitsche, un sell kann ich gut verstehne… Deitschland iss ferschur een wunnerschee’s Land, awwer’s Wedder iss hundsmiserabel! Ich grieye meh Geleyeheet, Deitsch in Florida zu schwetze as in Deitschland selbst! In Deitschland welle alle Englisch schwetze, mindeschtens in den Touristgegenden.
Wirklich gute Idee. Wir lesen gerne Deinen Blog und sind von der Sprache fasziniert.Man kann es gut verstehen und es ist doch eine tolle Vorstellung, mit euch schwätze zu könne. Wir wohnen in Koblenz, gar nicht weit entfernt von det Pfalz. Moni
Moni,
Gross Dank fer dei scheene Wadde! Koblenz iss arrig schee. Ich waar datt meh as ee Mol. Kumm bald widder un oft uff mei Blog. Ich schwetz aa Deitsch uff Facebook mit viel annere Leit. Griess aus Amerika!
-Doug
Dann bist du herzlich eingeladen wenn du das nächste Mal in Koblenz bist.
Moni
I schlag’ awwer vor, se solle v’leichd West Pennsylvania vermeide od’r nur kurz hier verweile–Development find’ i schrecklich, un mi scheint’s ja, wenn’s emol e Zentimeter frei gibt, will ma’ au do ‘neischneide schier wie wenn’s e Torte isch! Nu, im Oschde isch’s wirkli schee, sell isch wohr, un i hoff’ ja, mehr Leit aus’m ehemalige Vadderlaendle duhne ‘ruewerkumme.
Mit scheenschde Gruesse nomols,
Dei
Jim (Jakob) Kramer
Seller Pittsburgher Kerl
Ich hab schun gschwetzt mit die Pennsylvania Tourism Agency. Sie denke, ass die Barige vun PA odder die Shopping Centers der Grund waer fer die Deitschlenner fer naach PA kumme. Awwer ich denk, ass sie letz sinn: Die Deitschlenner odder “Hochdeitsche” kumme wehich die deitsch Kulduur un die Amish …
Ya fer schurr Michel!