Guder Daag Blog Leser! As viel vun eich schunn wisst, alle Yaahr blans ich en Gaarde. En Lewe mitaus frische Gaardesach iss ken Lewe! Well nau iss Moi schunn vorbei un ich hab es aerschdes Ding vun meim Gaarde gepickt: Schparregraas. Schparregraas iss allsfatt die aerschde Gaardesach ass ich alle Yaahr griege. Ich hab gedenkt ass vielleicht des Yaahr waerr es glee bissel schpeeder kumme wege der harte Winder, awwer nee, do waar es zu der rechten Zeit.
Nooch so en Winder, wie mir do in Pennsylvania ghatt hen, iss eppes frisch un grien arrig appeditlich. Ya ich hab grien gsaat. Wisst dihr as die Leit in Deitschland aa Schparregraas gaarn esst? Awwer ihre Schparregraas iss weiss! Fer uns Amerikaaner iss sell eppes anneres….weisse Schparregraas. Ich hab schunn viel weisse Schparregraas in Deitschland gesse un ich kann ehrlich saage ass es arrig gut iss. Sie esse es mit en Raahmbrieh….arrig gut. Wann es Schparregraaszeit iss in Deitschland hat yede Restaurant Schparregraas uff ihre Esszeddel.
Fer mich frische Schparregraas iss die bescht! Ich gleich es in en Brodpann mit viel Budder un glee bissel Sals un Peffer. Es iss aa arrig gut uff em Grill. Viel Leit do in Amerikaa gleiche Schparregraas Supp, es iss gut awwer ich gleich mei Schparregraas eefach gekocht. Mer kann warricklich es Friehyaahr, der Grund un die Sunn schmacke.
Gleicht dihr Schparregraas zu esse? Wie gleicht dihr es? In en Supp, uff dem Grill odder in der Brodpann? Odder gebt es annere Wege es zu koche? Schreib mir mit deinre Reseet!
Do iss en Audio Klip: Schparregraas
PA Dutch 101 
Hi Doug, Ich hawwe mein Gaarde aa schunn g’blanzt, un zwar mit Tomats, Karebs, Papriken, Cantaloup Melonen un Bohnen (“butter bean” wie man hier in Georgia saagt). Schparregraas gleich ich aa, mit Budder g’kocht odder aa g’grillt, awwer in mei’m Gaarde giwwt’s nit genunk Blatz fer sell. Wie ich dir schunn g’satt hawwe, hawwe ich aa Hinkel, Gaense un Enten, also iss mei Gaarde klee. Man kann nit alles duhne! Un die Hinkel, Gaense un Enten henn Babys nau! Also meh Arewet. Awwer Gschpass macht’s aa. Weisse Schparregrass hawwich in Deitschland g’gesse. Ich glawwe awwer, sell verlangt en latt Arewet zu mache, weil man die Blanzen mit Hei odder Stroh tief begrabe muss, damit sie mitaus Sunnenlicht waachse un weiss waerr’n.
Bis schpeeder!
Jack
Spargelcremezuppe isch mein Liebling weg Spargel zu esse!
Die Weisse Art aus Europa isch awwer echt SUPER!! Sell hot ma’ manchmol bei Aldi (eig’gmacht in Glaeserle). Frau Mueller duht Brotkrume in Butter un braet se, bis se leicht braun senn, dann duht se’n Spargel abtropfe un z’naechschd au no in die Pfanne ‘nei–bloss bis alles uffg’waermt (durchwaermt) isch–eefach klasse isch’s ja! I Koch au ger’, awwer nooch’m Schaffe isch ma halt zu mued’ dezu…
Maggikraut duht hier in Pennsylvania au gut wachse: sell isch offiziell Liebstoeckel auf Hochdeitsch un “Lovage” uff Englisch. Frau Mueller hot’s au in ‘rem Gaertele, un se hot mi recht viel davo’ g’gewe. I haeng’s immer “Kopf ‘runner” uff Bindfade uff, bis es ganz trocke isch, dann zupf’ i die Blaetterle ab un steck se in Glaeser–jetztle haww’ i g’nug bis nachschden Sommer—2 grosse Glaeser un e gleens fuer Fr. Dr. Kuschmierz (Die hot’s nie prowiert–i haww’ ‘r davo’ v’rzaehld, un se soll au e bissele davo’ b’komme!). ‘s schmeckt herrlich in Suppen, Sossen, un wenn ma e bissele uff Salat tut, un es no (wie die trockene Petersilie) e bissele “ziehe” lasse duht, isch sell au wunnerbar. Ma nennt’s Maggikraut, weil’s Aroma so aehnlich wie Maggiwuerze aus’m Glas schmeckt.
Beschde Gruesse aus’m Weschde,
Dei
Jim (Jakob) Kramer
Seller Pittsburgher Kerl