Guder Daag Blog Leser! Ich bin arrig schtolz do zu poschde iwwer mei neies Buch: Schtimme aus’m Kaerrichhof. Des Buch iss en Series vun 30+ katz Gschichte vun dem Lloyd Moll. Der Moll hot die Schtories in de 1940s fer die Allentown Morning Call gschriwwe. Ich hab sie versammelt un dann in Englisch iwwersetzt. Viel vun de Gschichte sin iwwer echde Dinge aus unsre Gschicht. Fer selle Schtories hawwich “Historical Notes” gschriwwe. Die Schtories sin so schee gschriwwe, du waerrscht lache, schmunzele, un brille.
Des Buch iss gut fer epper der Detisch schunn lese un verschtehe kennt. Es iss aa gut fer epper der Deitsch lannt. Un es iss aa gut fer epper der ken Deitsch verschteht weil all die Schtories aa in Englisch gewwe sin. Der Moll hot uns warricklich en Fenschder in der Vergangenheit gewwe. Der Moll waar een vun de wichdigschde Deitsche Schreiwer un aa een vun de Beschde.
All die Schtories sin iwwer die Idea as epper darrich en Kaerrichhof laafe kennt un mit de Dode schwetzt. Die Dode kumme zerick as Schpucke un verzaehle ihn ihre Leweslaaf. Manniche Schtories sin vun em friehe 1700s un annere kumme aus de 1800s. Mir heere vun Leit die mit de Insching gefochde hen, mit de Britisch darrich unsere Unabhaengigskeitgrieg waar un aa Schtories vun dem Lewe in en gleene Deitsche Schteddel.
Wann sell inderessant zu dir iss, kannscht du selles Buch do kaafe: Schtimme aus’m Kaerrichhof
PA Dutch 101 
Hallo liewwer Doug!
E schö’s Büchle scheind däs zu sei! I freu‘ mi au für Di un Dei Kollege, weil e Büchle scho viel Arweet koschde duht—awwer natürli au viel Freid mit sich bringt, gell?!
I hoff‘ ja, Di un Dei Liewe gaht alles beschdens. Mer hän hier scho Sorge g’hot: Frau Müller, e langjährig’s Mitglied vum Teutonia Männerchor hot neili‘ an e Herzinfarkt g’litte. Se isch Gott sei Dank jetztle wied’r deheem , un ihr gaht’s immer besser. Sie, ihr Mann un Dochter hän jahrelang bayrische un öschderreichische Lied’r bei zahlreiche Ufftritte g’sunge, un se hän au immer die traditionelle Trachte g’trage (obwohl se net direkt aus Bayern komme, hän sie die Mundart gut g’konnt un uns alle viel Freud‘ g’bracht—sell isch die Hauptsach‘, gell?!).
Früher haww i vis-à-vis vun Müllers g’wohnt, un bin immer no in d’r gleiche Gegend, also geh‘ i oft zu Frau M. zu b’such. Ihr Ma‘ isch vor drei Johr‘ g’storwe, un die Dochter isch v’rheiratet un wuhnt ziemli weit weg. Mer sehe uns au manichmol im Teutonia Männerchor Verein, un mer schwätze ger‘ üwer die alde Zeet.
Nomols beschde Dank für die Nachricht üwers Büchle-i hoff, i werd’s no in nächschder Zeet kaufe könne!
Mit schönschde Grüsse aus Pittsburgh
bin i ja
Dei
Jim (Jakob) Kramer
Seller Pittsburgher-Kerl