Guder Daag Blog Leser! Des Woch will ich iwwer en neie Erfaahring schreiwe. Letschde Woch hawwich en Account mit Twitter uffgeduh. Wisst dihr was Twitter iss? Twitter iss en Social Media Platform wie Facebook. Awwer Twitter hot ee schtrenge Regel: mer kann yuscht 140 Buschschtaawe yuuse! Des iss hatt fer mich weil ich gleich zu schwetze un zu schreiwe!
Twitter waar im Matz 2006 erschafft vun dem Jack Dorsey un drei annere Mannsleit un iss im Tschulei 2006 rauskumme. Die neie Site iss arrig bekannt in en katzi Zeit gewest. Bis Yaahr 2012 hot Twitter meh as 100 Millyonen Yuuser un sie hen meh as 340 Millyonen “Tweets” yeder Daag geposchdet! Uff Englisch saage die Leit “tweet” fer en Message, awwer ich gleich es deitsche Watt Zipp besser. Am Aafang 2015 hot Twitter meh as 500 Millonyen Yuuser. Sell iss 14% vun all die Leit in re Welt!
Mei Fraa waar net froh wann ich sie iwwer mei neie Twitter Account gsaat hab. Sie hot gsaat: “Du verbringscht schunn zu viel Zeit im Internet! Un nau nooch en annere Ding zu gucke! Du bischt verrickt!” Yawell, vielleicht bin ich verrickt. Awwer ich denk ass Twitter en gude Weg iss fer die Mudderschprooch auszubreite. Ich kann die Hashtag #padutch yuuse un wann epper sell sucht, waerrd er mei Zippe finne. Vielleicht kann ich meh Leit finne die unsere Schprooch lanne welle?
Fer nau iss es yuscht en Experiment, awwer ich denk ass es en gute Geleyeheit fer uns Deitsche iss. Wann du schunn zippscht, guck mol fer mich unnich em Handle: @djmadenford. Kumm zipp mit mir!
Do iss en Link zu mei Twitter: https://twitter.com/djmadenford
Do is en Audio Klip: Nau bin ich am zippe!
PA Dutch 101 
Hallo Doug!
V’leichd wär’s awwer gut, we’ma statt vun “Twitter” schwätzt, liewwer `s Wörtle „zwitschere“ saage dät—sell wär‘ viel meh‘ Deitsch glaww i ja!! Nu, jed’m däs Seine, so saagt ma, gell net? I bleib‘ liewwer meeschdens weg vum Internet, sell isch mi zu viel. Nur hin un wied’r kumm i jetztle dezu. I glaub’ ja, Dei Frau hot deelweis’ rechd: ma ka‘ zu viel Zeet v’rliere, we’ma immer vor’m Schirmle hocke duht. Ausserdem hoscht Du e liewwe Familie—i glaub‘, i könnt‘ mi kaum vun so liewwe Leit wegreisse, awwer na, Du bischt e guter Vat’r un dusch se net v’rnachlässige, sell isch glor (=klar—so duhne mer däs ausspreche: manichmol isch e hochdeitsches K wie e G auszuspreche, awwer na, so isch’s halt im schön’s Ländle, wu mer „Dachtraufschwäbisch“ schwätze, gell net?!!).
Viel Spass mit dei’m „G’tzwitschere“ un die viele „Haschtags“ un Zeigs, vo dene ma do rede duht—Hauptsach‘ isch ja, Du duhscht die Sprooch besser pflege as viele vun uns, un däs isch awwer schö!!
Schönschde Vor-Frühlingsgrüsse an Di un Dei Liewwe all
Sendet Di
Jim (Jakob) Kramer
Seller Pittsburgher Kerl