En arrig aldes Gedicht!

Guder Daag Blog Leser! Des Woch bring ich eich eppes anneres. Oft hawwich Gedichte uff Hochdeitsch odder uff Englisch fer eich iwwersetzt. Awwer des Woch hot en Kall, der Mark Getzin, mir en Gedicht gschickt, die er iwwerstzt hot. Was ich gut gefunne hab, waar ass er es vun Mittelhochdeitsch iwwersetzt hot! Der Mark lannt Deitsch nau mit mei Videos un PA Dutch 101. Oft schreibt er mir en E-Poscht mit Frooge iwwer der Mudderschprooch. Ee Daag hot er mich gfroogt uff en Gedicht zu gucke. Datt in mei Inbox waar en Mittelhochdeitsch Gedicht uff Deitsch! Sell waar doch eppes fer mich zu lese!

Mittelhochdeitsch iss die Hochdeitsch ass gschwischich die Yaahre 1050 un 1500 in Deitschland gschwetzt waar. Nooch 1500 hot die Schprooch sich verennert un heit zu daage schwetze sie Hochdeitsch in Deitschland. Wann mer Hochdeitsch schwetze un lese kann, iss Mittelhochdeitsch net leicht zu lese, awwer es net unmeeglich zu verschtehe. As ich an der College waar hawwich gemisst ee paar Mittelhochdeitsch Gedichte zu lese. Sell waar es letschdes Mol as ich Mittelhochdeitsch gelese hab. Nau kennt dihr sehne was en Iwwerraschung es waar, so en EPoscht zu griege.

Ya well, genunk iwwer Schproochgschichte. Do kummt es Gedicht. Ich geb die Detisch aerscht un dann die Mittelhochdeitsch:

Du bischt mei, ich bin dei:

vun sellem sollscht du gewiss sei.

Du bischt eigschlosse

in meim Hatz

verlore iss es Schlisseli:

du musscht allsfatt inne sei!

——————————————————

Dû bist mîn, ich bin dîn:
des solt dû gewis sîn.
dû bist beslozzen
in mînem herzen.
verlorn ist das slüzzelîn:
dû muost immer drinne sîn!

Gross dank nochemol zu dem Mark Getzin fer des! Um meh iwwer Mittelhochdeitsch zu lanne, klicke do: Mittelhochdeitsch.

Do iss en Audio Klip: En arrig aldes Gedicht

2 thoughts on “En arrig aldes Gedicht!

  1. Jim (Jakob) Kramer 06/03/2015 — 14:19

    Hallo Doug un alle Blogleser!

    Mittelhochdeutsch isch an sich e eeg’ne Sprooch, gell net? I weess net, ob’s wohr isch, awwer ma’ hot mi mol g’saat, Schwäbisch, Badisch, Bayrisch un Alemannisch seie Üwerbleibsele aus alder Zeet. Pennsylvanisch-Deitsch muss nadürlich dezu g’höre, weil’s au grösschdendeels aus sellre Mundarte au b’steht, gell? Danke fürs G’dichtle uff Mittelhochdeutsch, sell hab‘ i lange net meh g’sehe, i bi‘ scho lange kei Student uff der Universidät mehr.
    Alles Gute, un no viel Mundartspass!!

    Beschde Grüsse aus Pittsburgh,

    Jim (Jakob) Kramer

    Seller Pittsburgher Kerl

  2. Jack Speese 13/03/2015 — 14:47

    Selles G’dicht hemmer aa uff College g’lese, Doug! Nadierlich hot’s in unsrem Textbuch ‘ne Iewwersetzing uff modernes Deitsch g’gewwe. Un ich gleich dei Poscht iewwer “Honest Abe” en latt! Der war warrichlich een abbadicher Mannsleit un Braesident, meiner Meining nach viel tscheiter als seller Kall, der ietzt im Weiss Haus hockt, fer schur! Awwer wie g’saat, sell iss yuscht mei Meining.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close