Guder Daag Blog Leser! Des Woch iss eppes abbadiches in Pennsylvaania bassiert. Unser 47. Governor hot sei Eed genumme. Nau iss der Tom Wolf der “Grosse Mann” in Harrisbarrick. In des Poscht will ich eppse iwwer unserem neien Governor schreiwe.
Der Tom Wolf waar uff em 17. November in em Yaahr 1948 in Yarrick gebore. Er iss der Cornelia Westerman un dem William Trout Wolf ihr Soh. Er hot sei Bachelors vun Dartmouth College im 1972 grickt un dann sei Ph.D. vun Massachusetts Institute of Techonology im 1975 grickt. Er hot sei Fraa, die Frances, im 1975 gheiert un nau hen sie zwee Dechder. As er en Schtudent waar hot er zwee Yaahre in India mit de Peace Corps gebracht. Er iss en Demokraat.
Eb er in em Bolitikal Schpiel kumme iss, waar er der Besitzer vun sei Familye Building Supply Kumpani. As der Ed Rendell Governor waar, waar der Tom, der Secretary vun Revenue. So er kennt sich gut mit Harrisbarrick aus. In November 2014, hot er gege dem Tom Corbett in re Lecktion gschprunge.
Nau iss er der Governor un er hot schunn en neie Blann fer Pennsylvaania. Do sin ee paar Gedenke vun was er in Harrisbarrick mache will:
1. Geld fer die Schule. Meh as $1 Billion Dollaars waare vun de Schule unnich em alde Governor Corbett weckgnumme. Der Wolf will Geld an die Schule in Pennsylvaania gewwe so as die Kinner bessere Meeglichkeite hen.
2. Taxe. Der Wolf will es Tax System in PA uffbutze. Er glaabt as es viel besser sei kennt. Mol sehne was er un sei Cabinet mache waerre.
3. Pensions. De Schtaat Schaffleit ihre Pensions sin in Druwwel. Es gebt net genunk Geld in re Wutzlibank fer all die Schaffleit. Sell iss en Broblem as viel Acht griege muss.
4. En Moratorium uff Fracking in Schtaatparks un Schtaatbusch. Ich bin en grosser Fan vun sellem Gedenk. Die Parks un Busche sin fer uns Pennsylvaaniers. Sie solle net Gas Pads un Gas Brunne druff hawwe. Sell waerr en hatter Fecht mit de grosse un reiche Gas Kumpanies sei.
5. Meh Glaarheit in Harrisbarrick. Halleluya! Die Gebei in Harrisbarrick solle Glaas Wend hawwe, awwer mir wisse schunn as es net so sei iss. Mir, die Leit die die Taxe bezaahle, solle wisse was am aageh iss, gell?
So nau misse mir waarde un sehne was bassiere waerr. En grosse Broblem iss as der Wolf en Demokraat iss un die Leit in re General Assembly sin meh Republikaaner. Dihr wisst schunn wie sell geht. Awwer hoffetlich kennte sie zammekumme un zammeschaffe fer all die Leit in unsere Commonwealth.
Do iss en Audio Klip: En neier Governor
PA Dutch 101 