Zwee Yaahre alt!

Guder Daag Blog Leser! Well selle Woch muss ich iwwer mei Dochder schreiwe. Uff Dunnerschdaag hot sie ihr Gebottsdaag gfeiert. Nau iss sie zwee Yaahre alt. Ya, sie hot nooch en gude Rees um re Sunn gemacht. Awwer wie wisse mir as sie warricklich elter iss? Do iss en Lischt vun Dinge die ich gsehne un erlebt hab. Ich weess schunn as sie elter iss, was denkt dihr?

1. Sie iss greeser. Sell waar en leichter Ding zu saage. Ya, sie iss greesser un nadierlich wiegt sie meh. Awwer sell Fact bringt eppes mit: mer muss neier Gleeder kaafe. Sie waxt wie en Ungraut! Mer daetet denke as Kinnergleeder billiger sei waerre, sie sin gleener…..well, sell iss net Recht. Es macht nix as sie gleener sin, sie koschdet allsfatt nooch Geld!

2. Sie kann meh schwetze. As dihr schunn wisst, mei Dochder heert zwee Schprooche daheem. Ihre Mudder schwetzt Englisch mit ihr un ich schwetz Deitsch. Es geht eigetlich zimmlich gut. Un es hot en Vorteil, mei Fraa kann nau meh Deitsch schwetze un verschtehe weil sie es so oft vun mir heert. Ich weess aa as es schafft! Nadierlich, weil die Estella viel meh Englisch heert, kann sie meh Englisch verschteh. Sie heert Deitsch yuscht vun mir un mei Familye, awwer mei Familye wuhnt 2 Schtunn mit re Maschine weg, so sie heert es nicht so oft vun ihnne. Awwer, sie verschteht viel. Ich kann sie eppes uff Deitsch saage un sie kann es mache. Do iss en Beischpiel: “Schtell, gebt sell zu dei Mammi.” odder “Schtell, wu iss dei Naas?” odder “Schtell, kumm do.” Wann ich soddiche Dinge saage, duht sie eppes as zeigt mir as sie verschteht was ich saag. Neilich saagt sie meh uff Deitsch. Nau saagt sie Dinge wie: “Daadi Schuhe” odder “Ich Millich”. Ich weess as sie sin yuscht zwee Wadde Saetze awwer, ‘sis Deitsch!

3. Sie iss gscheiter. As sie waxt, kann sie meh mit uns “schpiele”. Fer die Blog Leser die Kinner hen, sie wisse was ich meehn. Die Estella iss yuscht zwee awwer sie weescht schunn was sie mache kennt um ihr Weg zu griege. As en Daadi, muss ich allsfatt schlau bleiwe. Ich kann net denke wie es in ee paar Yaahre vun nau waerrd!

So, do is en katze Lischt vun Dinge die mir zeigt as mei Dochder een Yaahr elter iss. Mol sehne was ich saage kennt wann sie drei Yaahre alt iss.

Do iss en Audio Klip: 

Ich, die Estella, un mei Fraa uff en Ride bei Knoebels Amusement Park.
Ich, die Estella, un mei Fraa uff en Ride bei Knoebels Amusement Park.

 

1 thought on “Zwee Yaahre alt!

  1. James (Jim) Kramer 31/07/2014 — 17:06

    Hallo Liewer Doug!

    I find’s Bildle ja wirkli schö un ka‘ mi nur vorstelle, wie Du die schönschde Erinnerunge sammle tuscht! E schöne Familie hoscht ja, däs brauch‘ i Di net z’saage!! Dass au Dei Frau so nach un nach Deitsch lerne duht, isch au wirkli super!

    I wünsch Di, Dei Frau, die gleene Estella un all‘ Dei Liewwe vum Gute nur’s Allerbeschde, un hoff‘ ja, Du wirsch uns au sozusage hie un do e bissele einschliesse, indem Du wie dieses Mol üwer Dei Familie schreiwe tuscht. Dei Blog isch sowieso ee’malig un wunnerbar, un i glaub‘ i bi‘ net alleen, wenn i Di sag‘, es isch e Freid‘, Dei Worte, G’danke un Emfpindunge zu lese.

    Dem G’burtsdaagskindle sag‘ i also hiermit: Hoch soll sie leben, hoch soll sie leben, dreimol hoch!!

    Mit viele gute Wünsche un beschde Grüsse aus‘ m „Grossstadt zum Weschde“ bin i ja

    Jim Kramer
    Seller Pittsburgher Kerl

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close