Iss Fried yuscht en Watt?

Guder Daag Blog Leser! Well, selle Woch hemmer zwee grosse Gschichte in re Nei-ichkeede. Israel schickt Soldaate un Tanks nooch Gaza; es gebt widder en Grundgrieg in re Mittoscht. Die Woch bevor hot Gaza un Israel Missels uff enanner gschosse un viel unschuldige Leit sin gschtarewe. Mir wisse net wie weit selle Grundgrieg gehe waerre. Hoffetlich, net zu lang un hoffetlich mitaus zu viele Verletze.

En grossere Gschicht iss uff em Dunnerschdaag bassiert. En Malaysian Airways Luftschiff waar iwwer die Ukraine nunnergschosse. Baut 300 Leit, unschuldige Leit, sin gschtarewe. Zu re Zeit wisse mir net vollig recht wer es geduh hot. Die Amerikaanische Regiering glaabt as Leit im Oschtukraine, die unabhaengig vun re Ukraine sei welle, hot es geduh. Die Leit, die “Verdeele Rappelkeppicher”, hen Flinte un Missels, die waahrscheinlich aus Russland kumme.

Es waar arrig bedrauerlich fer Malaysian Airways weil eb 4 odder 5 Munet hen sie en annere Luftschiff in re Indian See verlore. Zu re Zeit wisse mir nooch net wu es Luftschiff iss. So viele Tragedies fer ee Kumpanie iss viel zu viel. Ich bin schurr as mit selle letschde Luftschiff Tragedy, waerr die Kumpanie net iwwerlewe. Wer welle mit ihnne fliege?

So nau kummt die grosse Froog: was kummt naegschd? Was waerr kumme wann Russland die Missels zu de Verdeele Rappelkeppicher gewwe hot? Odder die Russe hen sie gelehrt wie mer sie yuuse? Was iss unser Roll do in Amerikaa? Un was saage mir zu de Familye vun re Leit die uff em Luftschiff waare?

Die Naame vun selle Poscht iss en echde Froog fer mich heit. Ich hock mich do in mei Kich mit mei Kaffie un mei Waddefresser…..zimmlich friedlich. Awwer in re ganze Welt iss es net so. Eb ee paar Munet sin die zwee Griege in Irak un Afghanistan beendet. Ich hab gedenkt, endlich kenne mir glee bissel Fried uff re Welt hawwe. Well, as dihr schunn wisst, hawwich net Recht ghatt. Vielleicht in unsere Daage iss Fried yuscht en Watt mitaus en “echde Welt” Mehning. Ich hoff un ich beed as sell net die Waarichlichkeit iss, awwer ‘siss arrig hatt anners zu denke.

Ich geh fatt selle Woch mit zwee Schticke aus re Biewel iwwer selle Topic:

Aus re 34. Psallem: Dreh dich vun Iwwel un duh Gut; such Fried un geh nooch es.

Aus re 16. Kabiddel vun Yohannes: Ich hab dir selle Dinge gsaat, so as in mir du Fried hawwe kenntscht. In selle Welt waerrscht du Druwwel hawwe. Awwer nemm Hatz! Ich habe die Welt iwwerkumme.

Do iss en Audio Klip: 

2 thoughts on “Iss Fried yuscht en Watt?

  1. Hi Doug,
    En arrig gut poscht! Very sobering to think about but very true. I like the Bible verses and someone who is not afraid to share them. So viel dank. Hald der glaawe, un macht’s gut.

    Luke

  2. James (Jim) Kramer 22/07/2014 — 17:27

    Hallo Liewer Doug!

    I b’dank mi nomols bei Di für Dei G’danke un schriftliche Ermutigung an uns all‘!

    Uff Hebräisch heesst Friede „Schalom“. I schreib‘ däs hier, weil als Chrischt isch ma mit Jesum verbunde, un Sei’re Sprooch, wu Er no uff d’r Erd‘ g’lebt hot, isch Hebräisch bzw. Aramäisch g’wä (Hebräisch hot ma‘ domols g’lese und im Gottesdienschd g’redet, im Alldaag hot ma awwer die verwandte Sprooch Aramäisch g’schwätzt). Schalom isch net bloss e G’fühl od’r e philosophischer B‘griff, nee, däs Wort enthält doch au die Idee vun „Ergänzung“ un „älls isch in Ordnung“. Net halbwegs, sondern ganz. Sell ka‘ nur d’r Herr uns’r Gott vollbringe, un i bi‘ ja froh, dass Du au sellre Biwelzitate mit ei’g’schlosse hosch. Du duhscht immer so wunnerbar schreiwwe, e Lehrer bischt scho, däs isch glor, awwer dezu au e Denker.
    I hoff‘ ja, Dein’re Familie geht’s au nur beschdens, un dass d’r Sommer glei’zeitig geruhsam un Friedevoll im beschde Sinn isch. Viele Grüsse a‘ Dei Liewwe all‘ sendet Di

    Jim Kramer
    [Seller Pittsburgher Kerl.]

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close