Guder Daag Blog Leser! Well, do bin ich widder mit eppes fer eich zu lese. Ich kann endlich saage as es Friehyaahr do iss. Fer uns in Pennsylvaania, iss es net schtarrick genunk kumme. Mir hen en arrig langer un harter Winder ghatt. Es waar kelter as normal un selles Yaahr hemmer Schnee…viel Schnee ghatt. Die letschde paar Yaahre hemmer viel Glick ghatt. Es waar net so kalt un schneeig, awwer 2013-2014 waar wie viel alde Leit zu mir gsaat hen: “En echde Winder…wie die gude alte Zeit, Yaahre zerick!”
Well, selle Woch sin die Temperatures glee bissel heecher gegraddelt. Eigetlich, waar es arrig waarm geschder. Mir hen 84 do bei mir ghatt! So ya, es Freihyaahr iss do. Manniche vun mei Blumme sin schunn uff un sie rieche so gut…abbadich mei Pingschtblumme. Pingschtblumme…burbel un siess…sell iss Friehyaahr zu mir. Friehyaahr meehnt aa as ich endlich in mei Gaarde gehe kennt. Ee paar Woch zerick hawwich mei Rototiller raus aus em Gratsch grickt un ich bin in die Gaarde gange um der Grund wacker vun sei Winderschloof zu bringe.
Selle Woch hawwich baut 3 Mol Schpaaregraass gepickt un graad in Budder gebrode. Mit Sals un Peffer….nix besser. O ya, mit en kaldes Bier iss es besser! Letschde Sunndaag hawwich mei Zwiwwele geblanst un geschder hawwich Buhne, Gehlriewe un Rotriewe Saame geblanst. Nau muss ich yuscht waarte bis sie waxe. Ich will aa Welschkann, Graut, Gummere, Chard, Kale, Peffer un Tomaets nooch blanse, awwer ich muss waarte fer die Blanse zu blanse bis Gedechtnissdaag. Do bei mir in de Bariye kann es nooch zu kalt darrich die Necht sei fer gleene Blanse.
Viel Leit hen ihr eegne Detox Regiment in unsere Gesellschaft. Viele schpringe odder gehe campe, annere lese odder schpiele en Schport, sie heere Myusick odder gucke Guckbax awwer fer mei Geld, gebt es nix besser fer dei Blutdruck nunner zu bringe un dei Schtress zu verliere as in der Grund zu schaffe. Fer uns Deitsche iss es in unsere Blut un Genes mit dem Grund zu schaffe. Es bringt uns neecher zu unsre Welt un ich glaab aa neecher zu unsrem Gott. Mei Rot fer all mei Blog Leser iss: blanst en Gaarde, ‘siss gut fer eiere Gsundheit un eiere Seele! Un nau iss graad die rechte Zeit fer sell zu duh!
Bis es naegschdes Mol, macht’s gut un schwetzt Deitsch!
Do iss en Audio Klip:
PA Dutch 101 
Hi Doug,
Ya, iss heechste Zeit, Gemeese zu blanse. Leider war ich krank in April, also bin ich noch net dazua kumme. Awwer ich hoffe, ich kann es neegschte Woche duhn. Ich hab zwar kee Gaardefraeser, ich loss mei Hinkel im Gaarde hinei, un sie duhn den Boden scheen locker scharre un mit Hinkelmist duenge. Nadierlich du ich sie aussperre, nachdem alles geblanst wird. Ich vermisse Pingschtblumme, leider duhn sie hier in Georgia nit guud waachse.
Also bis schpeeder un viel Gschpass beim Blanse wuensche ich dir!
Hallo Liewwer Doug!
I wünsch di no viel Spass im Gärtele! I haww kee‘ Gärtele meh, wu i in e Wuhnung im 3. Stock (2. Stock, wenn’s in Europa wär!) haww, awwer Hauspflänzle haww i allerdings. Du hosch rechd awwer: ma‘ soll warte, um die Sächele in’n Garte zu pflanze, weil mer evtl. no Froschd kriege könne! Ausserdem senn die 3 Eismännerle no net g’kumme: am 11., 13., un am 14. Mai in Europa, ee Daag später bei ons in Amerika kumme sie no. Däs b’zieht sich uff sellre 3 kalde Daage, die mer no im Mai hawwe, bevor’s Wetter richti‘ sommerlich wird! Sell hot mi e Schwob v’rzählt, un däs haww i nie vergesse. Bis Gedächtnisdaag zu warte isch g’scheit!
Beschde Grüsse an Dei Liewwe all‘, un i hoff, mit ’m Schuljohr un der Uni alles no wunnerbar gaht-die sollte sich freue, so ‘n b’gabte Lehrer un Professor zu hawwe!
Nomols hallo un vum Gute nur’s Allerbeschde
Sendet Di un Dei Liewwe all’
Jim Kramer
(Seller Pittsburgher Kerl)