Guder Daag Blog Leser! Well die Faschzeit iss schier gaar vorbei schunn. Wu sin die Daage gefloge? Nau kumme mir arrig schtarrick uff die Heiliche Woch. Naegschde Sunndaag iss Pallemsunndaag un dann hemmer Griendunnerschdaag un Karfreidaag. Naegschde Woch waerr ich net daheem sei, so es waerr ken neie Poscht gewwe. Deswege schreib ich mei Varoschder Blog Poscht selle Woch. As mir uff re Heiliche Woch denke, denke mir uff alles was der Gott un der Yesus fer uns geduh hen. En Schtick aus em Biewel der wichdich zu mei Glaawe iss, kummt aus em Buch vun de Psalme. So fer selle Woch un fer die naegschde Woch hawwich der 23. Psalm uff Deitsch iwwersetzt. Ich winsch eich en guti Woch un ich hoff as dihr dem Gott sei Fried in selle Heilichezeit finne kennt.
Der Herr iss mei Schaefer, ich fehle nix.
Er macht mich in griene Weede hiezuliege,
er fiehrt mich newwe ruhiche Wasser,
er frischt mei Seel uff.
Er fiehrt mich um die rechte Wege rum,
fer seinre Naame die Wille.
Yea, as ich darrich es Daal vun em Dod sei Schadde laaf.
Ich waerr ken Iwwel farriche, weil du mit mir bischt;
dei Schtang un dei Schtaab, sie dreeschde mich.
Du machscht en Disch var mich graad var meine Feinde.
Du salwscht mei Kopp mit Eel ei; mei Kuppche laaft ab.
Fer schurr waerr dei Gude un Lieb mich folgye,
all die Daage vun meim Lewe,
un ich waerr in dem Herr sei Haus fer ewich wuhne.
Do iss en Audio Klip:
PA Dutch 101 
Liewer Doug,
E Wunder bisch Du ja! Sell isch e schöne Üwersetzung, un däs isch gor net leicht zu schaffe! Im voraus wünsch i di un dei Liewwe all‘ e frohes Oschderfeschd—un dezu die Freid, die mer Chrischdeleit in der Erkenntnis hän, dass unser Erloser lewe duht! Nomols beschde Dank un schönschde Grüsse sendet Di un Dei Liewwe
Jim Kramer
Seller Pittsburgher Kerl