Guder Daag Blog Leser! Letschde Woch hawwich en Poscht iwwer en Movie gschriwwe, der fer en Oscar uffgenumme waar. Dem Movie sei Gschicht hot mit en Deitsche Familye in de 1700s zu duh. Selle Woch un naegschde Woch will ich Poschde iwwer mei Top 10 Movies schreiwe. Schunn seit ich en Kind waar, bin ich en grosse Movie Fan. Abbadich, bin ich en Fan vun alde Movies. As ich yunger waar, hot mei Freinde sell net verschtanne, fer was ich Schwatz un Weiss Movies gegliche hab. Was aa net normal waar, waar as ich Silent Movies aa arrig viel gegliche hab. Ee paar Yaahre zerick hawwich en Lischt vun mei Leibmovies gemacht. Heit un naegschde Woch, in Ehre vun de Oscars, waerr ich mei Top 10 Movies gewwe un en katze Beschreiwing vun de Movies gewwe. Veilleicht, wann dihr Netflix hett, kennt dihr die Movies aagucke!
10. Schindler’s List (1993) – Fer viel Leit, seller Movie hot sie die Gschicht vun re Holocaust gelannt. Seller Movie iss die Gschicht vun Oskar Schindler, en Mann der browiert Yutte vun de Nazis zu redde. Er kaaft Yudde vun de Nazis un hot sie zu seinre Factorie gebracht. Der Liam Neeson hot der Schindler gschpielt, un was fer en Tschopp er geduh hot! Am End hot er meh as 1,100 Lewe gereddet. Wie der Movie saagt: “Wer een Lewe reddet, reddet die ganze Welt.” Der Movie hot der Oscar fer beschde Movie vun 1993 gewunne. Der Steven Spielberg hot der Movie gemacht un er hot aa beschde Moviemacher gewunne.
9. One Flew Over The Cuckoo’s Nest (1975) – Der Jack Nicholson schpielt Ron McMurphy, en Dieb wer in Druwwel mit em Rescht iss. Er will net zu Bressen geh, so er saagt as er verrickt iss un iss nooch en Narrhaus gschickt. As er datt aakumme iss, muss er ausschtehe un sehne die Beschimpe vun Abwaardern Ratched (vun re Louise Fletcher gschpielt). Die Ratched griegt Macht darrich die Brobleme vun die annere verrickte Leit. Der McMurphy un die annere Mannsleit kumme zamme um en uffriehrische Schtand gege die greisliche Ratched zu mache. Der Movie hot beschde Movie, beschde Schpieler (Nicholson), beschde Schpielern (Fletcher), un beschde Moviemacher gewunne.
8. Philadelphia (1993) – Der Andrew Beckett (vun dem Tom Hanks gschpielt), en gay Lawyer grank mit AIDS, iss vun sei Rechtfirm gefeiert in Bang as die annere Lawyers sei Grankheit vun ihm griege daete. In en Suchung fer Rechtheit un Fried, er verglaagt sei alde Rechtfirm mit Helf vun en homophobic Lawyer, der Joe Miller (vun dem Denzel Washington gschpielt). Darrich die Schlacht in Court, seht der Miller as der Beckett net anners vun eenich-epper schunscht iss. Er verliert sei Homophobia un helft der Beckett mit sei Case eb er vun AIDS schtarewbt. Der Tom Hanks hot der Oscar fer beschde Schpieler gewunne un der Movie waar fer beschde Movie uffgenumme.
7. How Green Was My Valley (1941) – Es Lewe iss hatt in en Welsch Kohlegrub Schteddel un aa fer die Morgan Familye. Der Movie iss darrich die Aage vun re Familye ihr yingschde Soh gsehne, Huw (vun dem Roddy McDowall gschpielt). Mir sehne re Familye ihre Driebsaale. Der Daadi, Gwyllim (vun dem Donald Crisp gschpielt) un sei eldere Seh schaffe in re Kohlegrub awwer ‘sis gfahrlich un ungsund. Der Gwyllim hofft as der Huw in re Schul geh witt um en besseres Lewe zu hawwe, awwer der Huw hot sei eegne Gedenke. Die Dochder, Angharad (vun re Maureen O’Hara gschpielt) iss am scheenschde Maedel im Daal un iss arrig verliebt mit Mr. Gruffydd, der Schulmeeschder (vun dem Walter Pidgeon gschpielt). Die Zeide sin hatt un gude Menner finne sich mitaus Arewet un sin vun re Kohlegrub Besitzer beschimpt. Der Movie hot Oscars fer beschde Movie, beschde Schpieler (Pidgeon), un beschde Moviemacher (John Ford) gewunne.
6. It’s a Wonderful Life (1946) – Der George Bailey (vun dem James Stewart gschpielt) hot sei ganzes Lewe zu de Leit vun Bedford Falls gewwe. Er hot gewollt zu reese awwer die Meeglichkeit iss nimmi kumme. Fer viele Yaahre hot er der reiche Mr. Potter (vun dem Lionel Barrymore gschpielt) gfochde um Mr. Potters Winsch die Schteddel iwwerzunemme zu schtoppe. Awwer uff em Hallicheowed, George’s Onkel Billy hot $8,000 verlore. Der Potter hot es Geld gfunne un verschteckelt es. As der Bankmann die Geld Kaerzing findt, denkt der George as er un sei Buisness verantwortlich sei waerr un er waerr ins Bressen gschickt sei. Denke uff sei Fraa un Kinner, glaabt er as alles waerr besser sei wann er dod waerr, so er browiert sich selwer dodzumache. Awwer die Bede vun seinre Familye bringt en Engel, mit der Naame Clarence, zu ihm zu helfe. Der Movie waar fer 5 Oscars uffgenumme awwer hot ken gewunne.
Naegschde Woch waerr ich iwwer mei Top 5 Movies schriewe. Hett dihr eene vun de Movies schunn gsehne? Was denkt dihr vun mei Waahle?
Do iss en Audio Klip:
PA Dutch 101 
I haww scho Schindlers Lischde uff DVD, dezu au How Green Was My Valley un no viele annere. Mi kennschd no net gut, i haww e recht interessandes Lewe scho g’hat: 10 Jahre Lang bin i Jude g’wä, (Anno 1993 bin i zum Glauwe übertrete, un Anno 2003 nooch viele G’schehnisse im Lewe zum Chrischdentum z’rickkumme), un au haww i e wunnerbare G’sanglehrer g’hat: Herr Kantor Moshe Taubé. Er isch vum Herrn Schindler g’rettet worre: sei Nam isch Maximilian Taube g’wä. Dernach isch er nach Palästina g’reist, wu er in d’r Armee Palmach g’kämpft hot. Als er nach Amerika g’kumme isch, hot er sich bei Julliard School in New York a’g’meldet un hot 4 Jahre alles b’zahlt b’kumme—in Europa un Israel isch er scho e b’rühmter Kantor g’wä, un in Amerika hot er sei Studium uff sellre Weis‘ fortg’setzt. Er isch jetzt älder (er isch im Jorh 1927 g’bore worre) un singt net meh so häufig, awwer däs ka‘ er immer no mache, wenn er Luschd hot. Sei Vater un er senn g’rettet worre, sei Schweschder un sei Mutter awwer senn in Auschwitz umkumme. Sellre G’schichde isch traurig, Gott sei Dank senn die Zeite in Europa verbei, un mer bete all‘, dass so eppes net wieder vorkomme, zumindeschd net in Amerika oder Europa. Amerikaner meine oft, sell könnt net hier g’schehe. Ich awwer bin net so naiv: Deitschland isch domols eens vun dene fortg’schrittenschde Länder uff der Erd‘ g’wä, un’ s‘isch trotzdem drüwwe g’schehe. We’ma net die Zeiche merke duht un nix ernschd nimmt, was also ee’m vor dene Äugele steht, ka ma au domit rechne, dass es mol zu spät wird zu reagiere. Na, so pessimistisch will i net sei: i bi‘ froh, dass der Herr Kantor mi domols a’g’numme hot, mit mi hot er sogar aussschliesslich Deutsch g’sproche! E herzensnetter Mensch un e wunnerbarer Lehrer isch er ja. D’r Film isch wunnerbar g’dreht worre–i empfehle ‘n herzlich, weil ma die G’schichde doch au lerne sollte.
Beschde Grüsse aus kaltem Pittsburgh!
Herzlichschd
Jim
Seller Pittsburgher Kerl–nomols!!