Guder Daag Blog Leser! Ee paar Woch zerick hawwich en EPoscht vun dem Michael Clay grickt. Er wuhnt in Virginia. Nau es hot meh Deitsch Schwetzer datt Yaahre zerick gewwe, un heitzudaag gebt es allsfatt noch Amische un Mennischde un alde Deitsche, die nett zu weit Weck vun der Shenandoah Daal wuhne. Well der Michael hot mich gschriwwe um zu saage as er mei YouTube Videos gfunne hot. Er waar arrig froh zu wisse as es die Meeglichkeit gebt Deitsch zu lanne un zu browiere. Schpeeder hot er mich zerickgschriwwe un hot gsaat as er viele Gedichte uff Englisch gschriwwe hot. Er hot mich gfroogt eb ich ee paar uff Deitsch iwwersetze wolle daet. Nadierlich, hawwich YA gsaat. Ich hab ihn gsaat as er sei beschde Gedicht schicke sott. Nooch ee paar Daag, hawwich en Gedicht grickt. Ihr Naame waar: “Die alte rote Scheier”, well nau, sell klangt glee bissel Deitsch gell? Ich bin graad uff re Arewet gange un hab es iwwersetzt. Selle Woch will ich zum aerchden Mol an eich es vordraage. Viel Gschpass beim Lese!
Die alte rote Scheier
vun: Michael Clay – iwwersetzt vun re Englisch vun Douglas Madenford
Die alte Sunnelicht hot sanftlich em roschtigen blechen Dach
Sei Gippel aageregt, es seie Daage schunn gsehne hot,
Bidder un siess, viel un drieb.
Ruhiche Duft schteigt vun em Broochland.
Es deckt gschplitt-Loguschde Poschde un roschtige Fens uff,
Es gmaahnt die scheierhofe Grapp, as es Zeit iss
Die Alarm zu klange.
———–
Wischli vun Cotton Candy Wolke sin bei dem rot-backeschteenichen
Schannschtee sei Maul gemacht, mit en
Konstant Laaf, die saagt an alli-epper as der Winder do iss.
In Dutch Hollow schteht farichtlos die alte rote Scheier,
Yuscht nunner vun em Busch, abblose vun seim
Teschtament an de Mannsleit sei Bschluss um
Chaos un Iwwerzeitlichkeit zu benniche.
———–
Kohl farewede Grappe hocke sich uff selle Loguschde Poschde,
Sie gaxe iwwer geschders Finne, un die Blanne
Fer heit. Vielleicht glee bissel vergessene Welschkann vun re
Gmeschde Sau ihr Drog, odder die Iwwerreschte vun em Coyote
Sei Schlacht; yuscht die Zeit waerr selle alte Grappe saage.
———-
Sanfte Gratze kumme vun re grumme Bauerhaus Dier,
As der gedreiliche Mann schtreckt sei Rick aus
Un schtraelt sei langer Baart, sei Aage am schiele,
Er nemmt en langsamer Guck nooch der Scheier
As sei Grossdaadi gebaut hot, un gmaahnt sich uff die gedreilichkeit
Vun sei Daadis sei Glaawe – un finnet sich zufridde.
———-
Nuff der gut-geworne Paad, geht er zu seine Freinde,
Um acht uff sie zu gewwe, wie sie acht uff ihn gewwe hen –
En Binne die yuscht die Leit die mit Mudder Aerd gebunne sin, verschtehe kenne.
Er fiehlt die gfrorne Luft in sei Lunge, un weess
As Zeit yuscht en Ochdem selwer iss, awwer er finnet nooch Drooscht
As yuscht ee paar die Blessier vun kenne ghatt hen.
Do iss en Audio Klip:
PA Dutch 101 
Liewwer Doug,
Zuallererschd gratuliere i Di
Seller G’dichtle isch jo ei’malig! Wunnerbare Arweet hot seller Ma’ g’macht! I hoff’, sell macht alle Leser/inne grosse Freid’ wie’s mi g’bracht hot! No e Wörtle möcht‘ i dezugewe(i wees sonsch net, wie ma „übrigens“ in Mundart sage dät–mi duht’s net ei’falle): üwer dei neie Stellung in d’r Schul’—däs haww i neilich uff LinkedIn g’merkt un freie mi jo vo‘ Herze! I haww au neilich e neie Arweet g’funne, in d’r Stadtmitte! Büroarbeit, awwer was ka‘ ma? Immer meh Schule in unsrer Gegend duhne Deutsch als Fremdsprache abschaffe. Sell isch nadierlich traurig, gell? Awwer Du bringsch uns mit dei’m Interesse an PA Deitsch un Hochdeutsch noch viel Hoffnung für die Zukunft! Weiterhin alles Gute, un däs Gleiche au an Dei liewwe Familie!
Nomols mit beschde Grüsse aus’m ehemalige Stahl-un Eisestädtele
Jim Kramer
[Seller Pittsburgher Kerl]
Jim,
Gross Dank fer dei Wadde, awwer was du in LinkedIn lescht waar eigetlich net nei! Ich lehr Hochdeitsch un Gschichte schunn seit lang, awwer ich hab es yuscht nau recht uff LinkedIn geduh.
-Der Doug