Guder Daag Blog Leser! Willkumm zu 2014! ‘Sis widder en neies Yaahr un mir misse neie Nummern uff unsere Babiere un Checks schreiwe. Es Yaahr iss mit en arrig kalter Wind do in Noord-Oscht Amerikaa aagfange. Heit, as ich selle Poscht schreiwe, iss es yuscht 4 Graad bei mir un mit dem Wind iss es viel kelter. Mir hen glee bissel Schnee schunn ghatt awwer net zu viel. Der Kalenner saagt as Yenner arrig kalt do sei sollte. Mir misse mol sehne was warricklich kummt.
Viel Leit mache Resolutions fer es Nei Yaahr. Selles Yaahr mach ich ken Lischt. In Blatz devun, mach ich meh Videos. In 2013 hawwich 41 Videos fer Deitsch Grammatik un die Schprooch zu lanne gemacht un uff en neie Website geposcht: PA Dutch 101. Die Videos un die neie Website waare arrig erfolgreich. Ich hab viel Comments un E-Poschts vun viel Leit vun re ganze Welt grickt. Nau bin ich widder am schaffe. Neilich hawwich meh Videos gemacht. Selles Mol mach ich Videos um meh Deitsche Wadde zu lanne. Zu re Zeit hawwich schunn 12 Videos gemacht. Die sin iwwer Gediere, Blanse, Blumme, Veggel, Wadde fer die Kich un viel annere Topics. Mei Zeil iss nadierlich meh Videos darrich es Yaahr zu mache. Awwer ich brauch eier Helf! Ich will wisse was fer Topics ich duhe soll.
Do iss en Link zu re Seit mit de Videos: NEIE VIDEOS. Bsucht es mol, zeigt eiere Freinde un Freindschafte, dann schreibt mich mol eppes iwwer Gedenke fer neie Videos.
Bis naegschde Woch, bleibt gsund, bleibt waarm un schreibt mich mol eppes….uff Deitsch nadierlich!
PA Dutch 101 
Hallo Liewwer Doug!
Vorsätzele find’ i au net grad wunnerbar, weil ma se (in mei’m Fall mein’ i‘s ja) allzu oft net ei’halte ka‘! Liewwer eppes Neies a’fange we’ma ka‘ un will, statt e Vorsatz z’schmiede un‘ sich dann no b’schuldige un b’trübt werre, wenn’s schiefgaht!
Viel Spass mit sellre Videos—mei neie Arweet b’ginnt am kommende Mondaag, un in e poor Monate hoff‘ ich, e neie Computer kaufe z’könne-dann werd‘ au i mi die schöne Videos a’schaue un a’höre könne, die Du so im Name der Mundartpflege so zusamme’bracht hosch. I glaub‘ ja, Du bisch e Wunder: net viele Leit liewwe die Sprooch so wie Du, un Du machsch au unwahrscheinli‘ viel, um se net nur Di selwwer zu erhalde sondern au annere Leit se beizubringe! I hoff‘ ja, `S Chrischtkindle hot Di eppes extra un Schöns g’bracht! Däs un no viel meh‘ hosch verdient!
Nu, bleib awwer schö‘ warm bei sellere „siberische Temperature“! Un viel Spass un Freid bei Dein’re Arweet!
Beschde Grüsse an Di un (unbekannterweise) au an Dei Familie
Sendet nomols
Jim Kramer
Seller Pittsburgher Kerl
Jim,
Gross dank fer dei scheene Wadde. Ya, ich gleich was ich duh un ich finn mei Arewet arrig wichdig. Ich will alles duhe um unsere Mudderschprooch zu behalde un weiterlehre. Viel Glick mit dei neie Wadderfresser. Der Belschnickel waar gut zu mir awwer er hot nix grosses gebracht.
-Der Doug