Guder Daag Blog Leser! Well, ich hoff as alle vun eich en scheenes Dankfescht ghatt hett. Mei waar gut un es Esse waar nadierlich appeditlich. ‘Sis allsfatt gut Zeit mit re Familie zu hawwe. Mir hen viel gesse, gedrunke un viel Kaarde gschpielt. Nooch em Danksfescht, bin ich in der Busch mit mei Flint gange. ‘Sis waar kalt un schneeig, un ich hab ken Hasch gsehne! Ich hab ken Glick ghatt, awwer mei Bruder hot en grosse 6 Schpitzer gschosse. So mir waerre Haschfleesch in 2014 hawwe!
Ee paar Woch zerick, hab ich en Blog Poscht iwwer Haikus gschriwwe. Am End es Poscht hawwich gsaat, as dihr Haikus uff Deitsch schreiwe daetet. Ich bin froh zu saage as ich ee paar grickt hab! So, selle Woch will ich drei devun uff mei Blog poschte.
– Es Verschpreche –
Ball kummt der Winter
Awwer Gott hot verschproche
as Friehyaahr kummt trick.
– vun dem Jack Speese
– Faul –
Ich will net schaffe!!
Ich bin ins Bett am schlofe
Losse mich in Ruh!
– vun den Jay Bigornia
– Der Winter –
Der Winter kummt ball,
Mit Eis un Schnee, Luft so kalt:
Die Beem leer un kahl.
– vun dem Jim Kramer
Gross Dank an all die drei Schreiwer! Sie hen en guder Tschopp geduh. Well, heit gebt es yuscht 12 Daage bis Grischtdaag. Hett dihr all eiere Gschenke schunn kaaft? Ich brauch nooch ee paar bevor ich faddig bin. Heit iss aa em Pearl Harbor sei Daag do in Amerikaa. Sei so gut, un nemmt ee paar Minudde un denkt an all die Soldaate die ihre Lewe im Yaahr 1941 verlore hen.
Do iss en Audio Klip:
PA Dutch 101 
Schaade fer dich, awwer der Hasch hot arrig Glick ghatt! Mei Frau un insre Dochter, sie dun immer noch Gschenke kaafe, sell isch ne Sache die sie mitenanner gern dun. Adventssegen winsch ich dir un dei Family.
I b’dank’ mi bei rechd herzli’ bei Di für Dei schöne Wörtle üwer onsre Haiku-G’dichtle! Nu, s’isch schad‘, dass seller Hasch wegkumme isch, awwer Dei Bruder hot scheint’s „die Füass im Gmüass“ wie e Bayrischer Freindle vun mi, d’r Schorsch, eemol vor viele Johr’ g’saat hot! I haww nur ee’mol Reh od’r Hirschfleisch g’esse, un meh as 20 Johr‘ bin i Vegetarier, also muss i sage, i dät’s Fleisch net vermisse. I versteh‘ awwer, sell isch doch e bissele enttäuschend, gell , awwer uff d’r ann’re Seite isch’s au e Freid g’wä, ka‘ i mi denke, dass Du Zeeit mit dei’m Bruder hosch verbringe könne! Was ’s Kaufe vun Weihnachtsg’schenkle b’trifft: mei Schweschder un i wohne net meh nahe eenanner, die Nichde un Neffe senn alle scho gross, mer schicke uns gegeseitig Karte statt G’schenke z’kaufe. Die Mary mei Schweschder hot mi trotzdem eppes schenke welle, i haww g’saat: nu, Mary, wenn du drausse bisch un an so e Kessel vun d’r Heilsarmee verbeikummscht un’s Bimmle vum Glöckle hörscht, schmeiss e poor Münzle od’r no meh ’nei un denk an mi—sell mach‘ i au für di un dei Mann! Annere Leit häns au no schwierig, mer könne ihne‘ au e bissele helfe, gell net? Nu, g’segnete Weihnachte un „alles Gute für Leib un‘ Seel‘“ wünscht Di un Dei Liewwe all‘—der Jim aus ’m ehemalige Stahl un‘ Eiseviertele Pittsburgh!!
Mir henn aa dohmals Kaarde gschbielt un des Schbiel waar Euchre gheese odde ferleicht Haasepeffer. ‘S hot domols fiel schbass gmacht. Heitzerdaags kennich Euchre bloss mitme iPad schbiele bekaas ‘s keeni Leit gebt doh dermit ich schbiele kenn — ich meen alli ebber hot fergesse wu mer so ebbes schbielt.
Nau muss ich saage ass sell rieli en gut Schpiel waar. Ich meind mit Draarichkeet unn Draene in de Aage draa!
Der Bil ausme NM (mit ee bissel Schnee uffme Bodde)