Guder Daag Blog Leser! Well endlich bin ich widder do mit en neier Blog Poscht. As ich eb ee paar Woch gschriwwe, waar ich arrig gscheffdig mit meinre Austausch Drupp vun Deitschland. Well, nau sin sie widder abgflogge un zerick in re alte Heemet. Un ich kann ehrlich saage as alles so gut gloffe iss. Gott sei dank! Ya, mir hen widder Glick ghatt. Loss mich mol glee bissel vun ihre Zeit do in Amerikaa schreiwe.
Unsere Drupp vun Buchen (Baden-Württemberg) sin uff em 8. Oktower nooch Waschington DC gflogge. Sie sin dann datt fer zwee Daage gewest. Leider waar unser Regiering uff von re Arewet so sie hen all die Monuments un Smithsonians vun drausse gsehne. Sie kennte net reigeh! Ich bin mit en Bus uff em 10. datthiegange un hab sie nooch Pennsylvaania gebracht. Mei Schtudente waare arrig froh ihre neie Freinde zu dreffe un nooch Heem zu nemme.
Darich ihre Zeit mit uns hemmer viel geduh. Nadierlich hen sie ee paar Daage in die Schul verbracht. Ich glaab es waar glee bissel langweilig awwer es iss allsfatt inderessant die Unnerschidde gschwischich die zwee Systems zu sehne. Dann hemmer ee paar gleene Reese gemacht. Mir sin ee Daag nooch Penn’s Cave gange. Datt iss nadierlich en Hehling un sie hen aa en Safari Park. Mir hen allebeed Tours gemacht. Die Kinner hen die Hehling gut gfunne awwer die Safari Park waar eppes. Sie hen Gediere gsehne, die vun Nadd-Amerikaa kumme. Sie hen Hasch, Elk, Bison, Bender un Schwatz Baere gsehne. Sell waar yo eppes fer sie. Nooch Penn’s Cave sin mir nooch en Schtaat Park gange um en Picknick zu mache. Mir hen drausse in re Busch ghockt, gesse un glee bissel Football gschpielt. Die Hochdeitsche hen alles gut gfunne.
En annere Rees waar ee Daag nooch Lengeschder Kaunty. Sell iss zimmlich weit vun wu mir wuhne, awwer ich hab gewollt die Hochdeitsche Deitscherei zeige. Mir waare ee Daag uff em Ephrata Cloister. Der Conrad Beisel, re Cloister ihr Grunder, sin vun en Schteddel yuscht 20 Meile vun de Hochdeitsche ihre Schteddel kumme. Sie hen die Gschicht vun re Cloister arrig inderessant gfunne. Nooch re Cloister sin mir nooch Shady Maple gange. Sell waar yo eppes fer die Kinner. So viel Ess-sache un so en grosse Waahl un mer kennte so viel esse wie mer will! Sie alle hen gsaat, as so eppes wie sell gebts gaar nix in Deitschland!
Fer 10 Daage sin die Hochdeitsche bei uns gebliwwe. Mir hen zamme gelacht, gelannt un neie Freindschefte gemacht. Es macht mich so froh selle Austausch zu mache. Ich hoff as in re Zukunft kann es weiter lewe. Nooch ihre Zeit mit uns sin die Hochdeitsche nooch Nei Yarrick gfaahre um ee paar Daage in re “Grosse Appel” zu verbringe. Dann sin sie widder heemgflogge. Nau sin sie zerick in Deitschland, awwer sie bleiwe in Kontakt mit ihre Amerikaanische Freinde via Facebook, Twitter un Skype. Nau gucke mir mit freed uff Tschunn wann mir riwwerfliege kennte um unsere Freinde zu bsuche.
Do iss en Audio Klip: Widder Erfolg ghatt!
PA Dutch 101 
Can you check the audio clip? I am not finding it.
Anne, what media player do you use?
Hi Doug,
I think I see the problem. The link on the email and the link on the web site (which does work for me) have slightly different url’s. The one that works has widder-erfolg-ghatt1.m4a but the one on the email is widder-erfolg-ghatt.m4a. That gives me a “404 not found” message. Anyway, I can use the web site to hear the audio clip.
I hoff ma ka mei Deitsch gut g’nug verstehe—‘sisch net grad Pennsylvanisch awwer sell isch domit verwandt, gell? I bi‘ mit Deitsch (Mundart un Hochdeitsch) so uffg’wachse, haww au e Semeschder in Augschburg im Ländle Bayrisch-Schwaben (e bissele nooch’m Norde vun München do im Alde Land). I bi‘ froh, dass ma so eppes duht: junge Leit vo‘ driwwe ei’zulade un e Ausdausch mit denne Leit mache-sell isch e gute Idee un eppes ganz Positives!
Mi sin die „Unterschiede“ zwische Amerika un Deitschland domols net so uffg’falle wie bei annere Leit: z.B. bei meinre A’kunft driwwe bin i in e Pension (Pension Beck) in München ei’gkehrt un haww do die Nacht verbrocht. Am Morje bin ie uffgestanne un nunnergange zum „Frühstück“—ausg’numme dass es viele Leit do g’wä senn hot seller Raum schier wie die Küche bei meinre Oma ausg’uckt! Sell isch wirkli wohr! Un was Sitt un Maniere betrifft, bin i eher in Amerika net direkt am Fleckle, driwwe hän die Leit net g’glaubt, dass i frisch vum Amiland g’kumme bi‘!!
Mache Sie bitte no weiter mit’m Blog-sell isch wirkli gut g’macht un e Freid zum Lese! Alles Beschde un—wu mer in dene USA bald Erntedankfescht (od’r wie mer’s früher g’nannt hän, Danksagungstag) feiere, wünsch i Ihnen un alle Ihre Liewwe
Vum Gute nur’s Allerbeschde!
Beschde Grüsse aus’m ehemalige „Stahl-un Eisenstadt“ Pittsburgh
Ihr
Jim Kramer
Jim,
Gross Dank fer dei scheene Poscht. Ya, ich denk as es aa arrig wichdig fer die yunge Leit sell zu erlewe. Die Aage uffzumache iss en gude Ding!
-Der Doug