Guder Daag Blog Leser. Well selle Woch waar widder en schwere Woch fer uns do in Amerikaa. Mir hen zwee grosse Catastrophes ghatt. Uff Mundaag hot es widder en Terroristische Aagriff gewwe un dann uff Dinschdaag iss en Fertilizer Plant in Wescht Texas in die Luft gange. 14 Leit sin in Texas gschtarewe. Sell waar en Unglick awwer der Terroristiche Aagriff waar ken Unglick.
Uff em Mundaag waar der Boston Marathon. Am End der Marathon (bei re Faddig Lein) sin zwee Bombs in die Luft gange. Dausende vun Leit waare do um die Laafer zu seh un ‘Ya, du kannscht es schaffe’ greische. Baut drei Uhr Mundaag iss die aerschde Bomb in die Luft gange un dann baut 15 Minudde schpeeder iss en annere in die Luft gange. Drei Leit waare dodgemacht un 55 Leit waare schwer beschaedicht. Viele davun hen Beh un Erem verlore. Am Aafang hemmer gaar net gwisst wer sell gemacht hot. Zum Glick iss alles bassiert wu viele Surveilance Kameras waare. Mir hen all die Video un Pickders aageguckt un hen zwee Buwe gsehne. Die zwee hot schwatze Ricksacks aa. Die zwee Bombs waare drin. Die FBI un Boston Polies sin graad uff em Yaag gange um die zwee zu finne.
Mir hen meh Information iwwer die zwee darrich der Woch gelannt. Die waare zwee Brieder, die nooch Amerikaa vun Chechnye, Russland baut 10 Yaahre zerick eigewandert hen. Um halwer elf, Dunnerschdaagowed hen die zwee Brieder en Poliesmann gschosse un sin in en Feierkampf mit annere Polies gewest. Der eldere Bruder, Tamerlan Tsarnev, iss darrich der Kampf gschosse awwer sei yungere Bruder iss weckgeloffe.
Endlich, schpeet Freidaagowed, iss alles zu me End kumme. Der yunge Bruder, Dzhokhar, iss in en Boot gfunne. Die Polies un die FBI hen ihn lewendig gfunne un hen ihn gfange. Mir wisse nooch net ferwas die zwee Mannsleit sell geduh hen. Hoffetlich, as der Dzhokhar nooch am lewe iss, waerr er eppes saage. Wege es Mannyaag iss die ganze Schtadt Boston in Lockdown gange. Leit waare net erlaabt ihre Heiser zu verlosse. Die Busse un Subways sin aa zugemacht. Un unser ganzes Land sin var em Guckbaxe ghockt um alles zu seh.
Nau iss alles vorbei un Lewe kann zerick zu normal kumme. Awwer, do hock ich widder mit viele Frooge un kenne Antwadde. Ferwas? Ferwas muss Leit annere Leit dodmache? Wann die zwee Mannsleit Amerikaa net gut genunk gfunne hen, ferwas sin sie net ariyetsanners gange. Die drei Leit die uff re Marathon dodgemacht sin, waare alle unschuldig. Een waar en 8 Yaahre alt Bu! Sie waare datt yuscht fer die Laafe zu seh un in en Blinse hen sie ihre Lewe verlore.
Fer die letschde 5 Daage iss Amerikaa zammekumme. Mir hen en Feind zu finne un Gerechtkeit zu bringe. Nau iss alles vorbei un ich bin arrig schurr as mir widder zerick zu en aagschplittertes Land gehe waerr. Ich hab schunn heit damariye im Internet glese: “Wann waerr die Regierung saage as alles en “Inside Job” waare?” odder “Der Obama un sei Mannsleit hen alles so gewollt.” WAS? Wie kann soddiche Leit so denke? Mir hen so viele Tragedies in unserem Land, un wann sie bassiere, sin mir allsfatt Een Leit awwer so ball as sie vorbei sin, sin mir allsfatt widder viel Leit un nett meh Een. Mol sehne was von sellre Tragedy rauskumme waerr.
Do iss en Audio Klip:
PA Dutch 101 
Yoh, letschti Wuch waar sunnerbar. ‘S Broblem was ich hab iss die gans Sach mit em Yinger — yoh, die Beed eeyentlich. ‘S hot viele Interviews gewwe mit Eldre, unn Freinde, Freinde ihr Eldre unn die henn alle gesaagt ass die Beed gude Leit waare. Unn nau hot der 19 Yaeriger mit der Poliesmen geschwetzt (rieli ‘geschriwwe’), unn der hot gesaagt ass die Beed eeyentlich nix mit Ellkeide rumglaafe waerre unn ass sie alle selbscht geduh haette. Ich denk ass ‘s rieli wichtich iss fer rausfinne ferwas sie, die Beed, en gut Lewwe doh in de Vereenichteschtaate em Fenschter nausgeschmisse henn.
Mir iss’s en gudi Eidie rausfiggre ferwas selle Leit so ebbes duh. Ich denk ass die Faekt ass heitzerdaags iss ebber (Auslenner) ekschpekt ass er sei Kultur, Schprooch, Musik, unn Gleeder uffgewwe muss. Sell iss gehaeppenet weeich de Insching, Mexigaaner, Tscheppenies, Cajuns (Keetschens) unn die Deitsch (unn glaab mir ass ich en bissel dervun als Bu gefiehlt hab bekaas ‘s Schteddel uns naegscht waar mit Englisch unn Franzeesisch gefillt — die henn uns Nazis genannt).
Ich schtimm zu ass mer alle Amerigaaner sinn, awwe mer sinn aa verschiddene Leit aus verschiddene Cultures unn als Amerigaaner sott sell reschpektiert sei warre.
Ich denk ass die Muslims die neie Yuude, Insching, Eirisch, unn Deitsch sinn. Sell waar unn iss imminooch en Broblem — mer henn Broblems fer ‘die Annere’ leicht aksepdiere; sie henn Broblems fer ihr Kultur uffgewwe. ‘S sott en Balance gewwe — heit simmer net dermit doh.
Mach ich en Exkyuus fer der 19 Yaeriger? Eeyentlich net. Uff der anner Hand, muss ich mich frooge hemmer die Muslims akseptiert, odde hemmer unn duhne mer sie zu hatt schtosse fer sie alles uffgewwe, ihr Identity, ihr Kultur weckschmeisse?
Zwar ass doodmache iss doodmache. Sell iss en Kreim unn er hot’s geduh — der griegt was er griegt. Awwe ich denk, “Kenne mer ebbes anner duh fer selle Sitschueeschens zer Seit dreiwwe?”
Ferleicht kennemer Muslimfobia niederleege unn fersuche fer sie ferschtehe unn, sell iss wichtich, sie lanne wie en Leit wu aus verschiddne Kulturs gemacht iss kenne sammelewwe anne enanner doodmache. Mer henn schlisslich gelannt ass die Insching (in de 1970’s) net die Feinde sinn. Hemmer nix dervun gelannt? Warre mer die gans Sach iwwerduh? Welle mer en nei Wounded Knee? Mer henn en nei Wounded Knee griegt mit der Boston Marathon. Mache mer die saem Blunders ass mer vun Custer bis zer 1970’s gemacht henn, odde zeege mer die nei Grupp, die Muslims, was ‘s bedeit fer Amerigaaner sei?
Am letscht, ich saag ass die Brieder henn griegt wu sie verdient henn. Ich haett liewwe inre Zukunft, ass mer selle Sitschueeschuns fermeide mit besser Training fer die wu doh ziehe welle. Ich meen, lass ‘Patriotism,’ ie ‘Nationalism,’ zerseit falle, unn lann die Neie, was ‘Amerigaaner zer sei’ eeyentlich bedeit. Mer sinn aus verschiddene Schtamme mit unser eeyene Kulturs, Esssache, Musik, Gleeder, unn Schprooche, awwe mer misse mitenanner wuhne so unser Kinner henn en gut unn schee deheem.
bloos mei Gedanke aus em schee NeiMexico,
der Bil
Arrig gut gsaat Bil! Du hoscht viel gsaat as was ich aa denk.
-Der Doug