Es feiere nemme!

Guder Daag Blog Leser! Well nau sin mer in em Nei Yaahr. Mir hen widder die Gelegeheit vun vanne aa aazufange. Hett eich ee paar Resolutions gemacht? Ich hab ee paar gemacht: eene devun iss as ich wennicher Zucker selles Yaahr esse will. Mol sehne wie sell geht.

Selle Woch will ich iwwer eppes anneres schreiwe. Schunn seit lang hawwich ghatt en Series vun Bicher die ich arrig gaarn lese. Die sin “Pennsylvania Fireside Tales” vun dem Jeffrey R. Frazier. Es gebt siwwe Bicher. Alle Bicher sin voll mit inderessande Gschichte vun Pennsylvaania un unsre Gschichte. Es gebt viel Schpuckgschichte, Gschichte vun bekannte Volksheld un alde Aawerglaawe. Viel vun de Gschichte kumme aus em 18. un 19. Yaahrhunnert. Die Bicher sin net deier un sie sin arrig gschpassig zu lese. Oft hock ich mol hie un begin zu lese, un zwee Schtund schpaeder bin ich immernooch am lese! Mei Schtick selle Woch kummt vun Buch 3 aus selle Series.

Viel Yaaahre zerick hen viel Deitsche geglaabt as en Hex “es feier” nemme kennt. Sell mehnt as em Mann sei Flint net meh schiesse kennt! Ya, en Hex odder en Powwower kennt en Schpell saage un me Paerson sei Flint waerd schaadlos sei. Die Leit hen gedenkt as sell losgebrocht waar wann die Hex es Pulwer vun aabrenne hinnert. Odder die Kuggel waerd yuscht aus re Flint rausrolle in Blatz vun weit zu fliege.

Viel vun sellre Gschichte kumme aus em 1700s wann Pennsylvaania die Frontier waar. Heitzudaage wisse mir schunn as es ken Hexe gebt un es Broblem waar meechlich as die Zindpulwerloch uffgschtoppt waar odder die Pulwer zu naas waar. Un fer die Leit welle Flinte schiesse kennte un nix geschosse hen, muss mer errinere as mit en Flintlock, hen Mann gemisst en arrig gude Schiesser zu sei. In de frieh 1800s, hot es so en gut bekannte Hex in Centre Kaunty gewwe. Sei Naame waar der Benny Ripka. Er hot oft abgeblost wie er “es feier” nemme kennt. Selles Buch hot ee paar Gschichte iwwer dem Benny.

Wann dihr meh wisse wollt, odder ee paar vun selle Gschichte lese wollt, sei so gut un kaaft selle Bicher. Do iss en Link um die Bicher zu kaafe: http://www.pafiresidetales.com/

Bis naegschde Woch, macht’s gut un ich hoff as niemand “eier Feier” nemmt!

Do iss en Audio Klip: Es feier nemme!