Ferwas seid dihr Dankbaar?

Guder Daag Blog Leser! Well mir sin nau im Schpotyaahr un ‘sis widder November! Do in Amerikaa iss November der Munet vun Danksfescht. Ich gleich Danksfescht arrig viel, arrig gude Esse un ich kann Zeit mit meinre Familye rumbringe. Awwer oftmols, vergesse mir warricklich Dank zu gewwe.

As viel vun eich schunn wisst, bringe ich viel Zeit uff em Facebook rum. Ich glaab ich bin net der eenzicher! Neilich hawwich im Facebook gsehne as viel vun meinre Freinde poschte alle Daag im Novmeber ee Ding as sie Dankbaar zu sei. Ich finn sell en gude Gedenk. Ya, uff em Danksfescht denke mir uff was mir Dankbaar zu sei awwer, mir solle efders uff soddiche Dinge denke! Es Lewe iss zu katz un die Zeit geht zu schnell! So ich hab gedenkt as selle Woch in mei Blog Poscht waerr ich en katze Lischt gewwe vun was ich Dankbaar bin. Ich laade all meine Blog Leser aa ei eppes wie sell zu duh.

Ich bin Dankbaar fer:

1. Mei Familye. – Die sin warricklich em Lewe sei Leim. Mir helfe uns wann mir Druwwel hen. Mir kumme zamme fer die Feierdaage zu feiere. Mir sin unsere Vergangeheit, unsere Lewe nau un nadierlich aa unsere Zukunft. Wie waerr eier Lewe mitaus eiere Familye sei? Ich kann ehrlich saage as mei Lewe mitaus Familye waerr Mehningslos.

2. Mei Gsundheit. – Ich hab arrig viel Glick im Lewe ghatt. Ya, nadierlich waar ich ab un zu Grank. Baut drei Yaahre zerick hawwich gemisst mei Appendix rausgschnidde zu sei. Awwer, vun annere Grankheite kann ich net schreiwe. Ich hab Freinde die oft Grank sin, sell macht mich leedmiedich. Ich bin arrig Dankbaar as mei gleene neie Dochder aa Gsund iss un ich bede as sie so bleibt!

3. Mei Tschopp. – Widder hawwich ich Glick ghatt as ich en Tschopp hawwe. As dihr schunn wisst, kenne viele Amerikaaner sell net saage. Mei Daadi iss eens davun. Mir hen Brobleme do in Amerikaa un schier gaar 7% vun unsere Leit sin mitaus en Tschopp. Ich hoff as sell sich schtarrick verennert. Zu viel Amerikaaner misse lewe mitaus Sicherheit un hen net genunk Geld fer Ess-sache zu kaafe. Ich bede nooch widder fer unser Land un unsere Zukunft, en Zukunft mit viel meh Gedeihlichkeit.

4. Sell Blog. – Ya, ich bin Dankbaar fer sell Blog. Ferwas froogt dihr? Well, mit sellem Blog kann ich mich yede Woch hiehocke un eppes uff Deitsch schreiwe. Wu ich wuhn gebt es net zu viel Deitschschwetzer. Darrich sell Blog un die Internet kann ich mit annere Deitsche schwetze un neie Freindschafte mache. Ich weess net wie viel neie Leit ich gedroffe hab, un mitaus sell Blog hett ich kenne davun gedroffe! Deitschleser und Schreiwer vun re ganze Welt hen mich E-Poschts un Poschts do uff mei Blog gelosse…un alles uff Deitsch. Sell iss eppes was mich nooch net glaawe kann.

Well, datt iss mei katze Lischt vun Dinge die ich dafer Dankbaar bin. Wie guckt eier Lischt aus? Hockt eich mol hie, nemmt glee bissel Zeit un schreibt mol eier Lischt. Sell iss en gude Gefiehl es zu duh!

Do iss en Audio Klip: Ferwas seid dihr Dankbaar?