Guder Daag Blog Leser! Well do bin ich widder am Waddefresser un ich will eich glee bissel iwwer mei Rees nooch Deitschland verzaehle. Uff em 17. Tschunn sin ich un 20 vun meine Schtudente nooch Deitschland gfloge. Mir sin vun Newark, NJ graad nooch Frankfurt gfloge. Es Flug waar arrig gut, awwer ich hab net schlofe kennt.
As mir aakumme sin waare unsere Deitsche Freinde datt um uns zu bewillkumme. Mir sin dann baut 2 Schtunn in em Bus nooch die glee Schteddel Buchen gfaahre. Dann hot unsere Zeit in Deitschland aagfange. Im Schpotyaahr hawwich eich verzaehlt as alle zwee Yaahre mache mei Schul un en Schul in Deitschland en Exchange Program. So nau waare mir in Deitschland un meine Schtudente hen ihr Exchange Partner widdergsehne. Alle waare nadierlich froh fer sell. Die Schtudente dann sin mit ihrer neien Familye weggfaahre. Ich find es arrig gut un wichdig as mei Schtudente 10 Daage mit en echde Hochdeitsche Familye wuhne. Was fer en Erfaahring iss sell?!
As mir in Deitschland waare hemmer viel geduh un viel gsehne. Mir hen en Daag in Rothenburg ob der Tauber ghatt. Sell waar gut. Die Kinner hen in en grosse Grischtdaag Schtor eikaaft. Mir hen der Tilman Riemenschneider sei Halliche Blut Altar gsehne. Uff en annere Daag hemmer Stuttgart bsucht. Mir hen en Tour in es Mercedes-Benz Museum gemacht. Sell waar yo eppes zu seh. Die hen Maschiene….viel Maschiene. Sie hen aa die aerschde Maschiene der Welt. Mir sin aa nooch Ludwigsburg gange. Datt iss der Schloss Ludwigsburg. Sell iss wu die keenichliche Familye vun Wüttemberg gewuhnt hen. Sell waar aa eppes zu seh! Es Haus waar arrig gross un mer kennt seh wie die reiche in de 1700s gewuhnt hen…un es waar viel besser as die Bauern!
Uff re Wochend hen die Familye eppes mit ihr Amerikanner gemacht. Ich persehnlich bin nooch Würzburg un in die Neckar Daal gfaahre. Zum Glick waar es Wedder arrig gut darich unsere Zeit in Deitschland. Es waar drauerich uff em 27. zerickzufliege. Alle mei Schtudente hen gewollt datt zu bleiwe! Awwer ich hab sie gsaat as ich ihre Familye in Amerikaa verschproche hab sie sicher nooch Amerikaa zerickzubringe!
Wie allsfatt waar die Zeit in Deitschland eppes. Gute Freinschafte sin gschtarickt, meine Schtudente hen en annere Kuldur erlebt un sie hen die Meeglichkeit ghatt ihr Hochdeitsch zu yuuse. Nau sin mir widder do in Amerikaa. Ich hab der Sommer mich auszuruh, in mei Gaarde zu arewe un Zeit mit Freinde un Familye zu verbringe.
Ich winsch eich viel Gschpass naegschde Woch uff em 4. Tschulei! ‘Sis widder Zeit zu feiere!
Do iss en Audio Klip: Iwwer em Atlantik un zerick!
PA Dutch 101 