Guder Daag Blog Leser! Gschdrowed hemmer arrig schtarke Dunnere, Wedderleech un Rege ghatt. Zum Glick hot es kenn Tornados gewwe un aa zum Glick hen uns unser Leckdrick net verlore. Heit Mariye waar die Sunn widder am scheine. Ich glaab as dihr findt sellre Woch ihr Naame glee bissel luschdig. Well, loss mich mol verzaehle!
Heit hot mei Fraa ihr Bobblischauer ghatt. As dihr schunn wisst iss sell eppes fer yuscht die Weibsleit. Sie hen en scheene Party uff unsre Karrich ghatt. Mir hen scheene Gschenke grickt, viel gleene Fracke un Schpielsache.
As die Weibsleit am feiere waare, sin ich, mei Daadi, Grossdaadi un Schweeger uff em Rutsch gange. Alle Yaahr gebt es en grosse alde Tracktor un Maschien Schau bei Penn’s Dracheloch. Mei Familie hot drei alde Tracktors so wann mei Daadi zu so en Schau gehe kann, geht er fer schurr. Die Schau selles Yaahr waar wie all die annere. Es hot viel Tracktors, alde Inscheine un annere alde Bauereimaschiene gewwe. Es hot aa viel gude Essmeeglichkeete gewwe. Selles Yaahr hot es aa en Flohmarick gewwe. Die Verkaafere hen so viel verschiddliche Sache…es waar hatt zu glaawe.
Mir sin darrich die Tracktors geloffe un hen mit viel Leit gschwetzt. Mir hen nix kaaft…yuscht glee bissel zu esse. Ich hab gsehne as im Schpotyaahr waerr es en annere Schau gewwe. Vielleicht hen mei Bloglesers Inderesse dohie in die Barriye zu faahre!
Gebt es aa soddiche Schaue bei eich?
Do iss en Audio Klip: Wann die Weibsleit gschefdich sin, kenne die Mannsleit schpiele!
PA Dutch 101 