Guder Daag Blog Leser! As ich en Kind waar hemmer zwee Telephones daheem uff re Bauerei ghatt. Een waar in der Kich un die annere waar in meine Eldre ihr Bettschtubb. Allebeed hen en Cord ghatt un wenn mer epper aarufe wott, hot mer gemisst die Nummere auswennich zu wisse. Die Telephone kennt yuscht ee Ding duh: epper aarufe.
Schpeader in mei Kindheit hemmer en Telephone mitaus en Cord grickt. Ich hab gedenkt as sell wunnerbaar waar. Mer kennt darrich es Haus laafe un schwetze mit epper uff re Telephone! Dann als ich baut 18 Yaahre alt waar hawwich mei aerschde Cell Phone grickt. Waar sell eppes! Nau kennt ich in mei Maschine faahre un uff meinre Telephone schwetze! Awwer zu sellre Zeit kennte die Cell Phones yuscht annere Leit aarufe.Well, heitzudaage iss sell net meh die Regel. Nau, die Froog iss: was kann unsere Telephones net duh? Gell? Letschde Woch bin ich zu meinre Verizon Schtor gange weil es Zeit waar fer mei Vertrag zu erneie. Wenn mer sei Vertrag erneie muss, kann mer en neie Telephone griege.
Ich hab en neie iPhone gewaehlt. Ich muss ehrlich saage as ich arrig uffegregt waar fer en iPhone zu bekomme. Die letschde zwee Yaahre hab ich en Blackberry ghatt. Blackeberries un iPhones sin was mir saage: Gscheitphones. Die sin Telephones die nadierlich Leit aarufe kenne, awwer sie kenne so viel meh aa duh: E-Poscht checke, im Internet surfe, Pickders mache, VIdeos schaue un mache, Schpiele schpiele un meh un meh un meh. Mei iPhone hot die meeglichkeit vun iwwer 500,000 Apps zu waehle. 500,000! Harrieyesses!
Geschder hawwich mit meinre neien iPhone “geschpielt”. Ich hab en App gedownloadet der heest: TuneIn. Sell iss en App as mir erlaabt Radio Stations vun all iwwer re Welt zu heere! Ya, uff mei Weg zu re Arewet geschder, hawwich en Radio Station in Mainz, Deitschland aagharicht! Dann schpaeder geschdrowed, hawwich mei gude Freind in Michigan aagerufe, awwer mir hen es mit FaceTime gemacht. FaceTime iss warricklich eppes! Ya, mir hen mit enanner gschwetzt, awwer mir hen aa mit unser Telephone enannere lewendig gsehne! Mit unsre Telephone un ihre Cameras, kennte mir enannere sehne un zu gleiche Zeit schwetze! Sell iss yo doch eppes!
Wann ich zerick uff mei Kindheit denk, denk ich as alles so eifach waar. Un vielleicht waar sell besser, awwer unser Technologie kann aa gut duhe! Ich bin sicher as viel vun mei Blog Leser schunn en Gscheitphone hen. Welle Apps gleicht dihr? Wollt dihr mit mir glee bissel FaceTime mache?
Do is en Audio Klip: En Telephone kann sell duh?
PA Dutch 101 
Ya, GfressZeit iss ferschur ebbes. Endlich hemmer was der Dick Tracy hot fuffsich Yaahr zerick ghatt. Ich glaab ass sell iss der “killer app” fer eiFoon unn eiPaed. Groossmemm nie verstehe en PC gaar net, awwer sie verstehe GfressZeit graad uff die Schtell. “Do sinn mei Groosskinner! Sell muss ich heit griege unn lanne!”
Doug, was iss dei Accountname uff Gfresszeit. Ich yuus en iPad deheem …
Ich yuuse mei iPhone, so ich glaab as mei Account iss mei Telephonenummer: 18144041630. Es Problem iss as wu ich wuhn, die Signal iss net so schtarrick, mannichmol geht es, mannichmol geht es net. Alles gut in em Alte Land?
Ya, Gfresszeit…sell iss en gude Wadd! Yede Woch wann ich mei Blog Poscht schreiwe, un ich kumm zu en Wadd (abbaddich mit Technologie Wadde) denk ich was ich duh soll. Mannichmol mach ich en Deitschewadd, annere Mol yuus ich es Englisch Wadd….sell iss en schweri Froog was recht iss! Awwer ich gleich “Gfresszeit”.
Doug, hoscht cable TV, verleicht mit em modem? Wann du yuscht aa en “wireless Router” griege deetscht, daageslang hoscht plenty Signal. Unn besser, wann du Wireless yuuse deetscht, breichscht net fer Minudde odder Data bezaahle.
Wer iss “Die Mischtgawwel”? Ebber Neies, odder ebber, ass mer kenne …
Du kennscht mich. Mer henn uns schunn gsehne. Ich bin der Kevin Sterner. Awwer ich denk ass en deitscher Schreiwer muss en Feddernaame griege. Zidder ass die menscht ass ich saage deet iss yuscht Mischt ennihau, noh waer ich “Die Mischtgawwel” warre deet.