Guder Daag Blog Leser! Well do bin ich widder mit em neien Blog Poscht. Selle Woch will ich en annere Aadeel vun mei Wichdiger Deitscher Series schreiwe. Selle Aadeel is iwwer en Mann vun meinre Heemet: Centre Taunschip, Barricks Kaunty. Hett dihr gwisst as der zwett-beschde March schreiwer en Deitscher waar? Ya, sell iss ken Lieg! Nadierlich wann mer vun March Myusick denke, denke mir graad vun dem John Philip Sousa. Er waar der March Keenich, un er hot der Naame verdient. Awwer der March Prins muss der Monroe Althouse sei!
Der Monroe Althouse waar uff em 26. Moi im Yaahr 1853 in Centre Taunschip, nett so weit weck vun Wescht Leesport gebore. Er waar de Jonathan un Mary Althouse ihr Soh un er waar uff der Familiye ihr Bauerei uffgewaxe. As en Kind waar er arrig begaabt. Sei aerschde Inschtrument waar die Geig un dann schpeeder hot er der Trombone un der Baritone Horn glannt. Er iss mit der Buffalo Bill’s Wild West Show gereest un sei aerschde Lied waar fer sell gschriwwe.
Im 1880, nooch glee wennich Zeit in en Zigar Schtor un en Hut Kumpanie waar er as Professional Myusiker genannt. Er hot mit yede Drupp in Reading gschpielt. Er hot oft mit der Ringgold Band gschpielt un schpeeder waar er der Myusick Direktor fer sie. Er waar arrig bekannt fer sei Gaab um Marches zu schreiwe. Er kennt Marches fer yede abbadiches Geleyeheit schreiwe. ‘Sis geglaabt as er meh as 150 Marches gschriwwe hot! In de 1890s hot sei Baend oft in Atlantic City gschpielt. Im Yaahr 1912 hot er un sei Baend fer dem Bresident Woodrow Wilson sei Innauguration gschpielt.
Der Monroe iss uff em 12 Oktower im Yaahr 1924 gschtarewe. Der letschde Schtick as er directed hot waar der Stars and Stripes Forever. Sell iss gut weil der John Philip Sousa en guder Freind vun dem Monroe waar. Viel grosse Myusick Leit saage as Althouses Marches die beschde Schtross Marches aller Zeit sin.
Un nooch was: der John Philip Sousa iss nooch Reading im Yaahr 1932 kumme um en Anniversary Konzert mit Althouses Ringgold Baend zu gewwe. Bedauerlicherweese iss er in Reading der Nacht bevor dem Konzert gschtarewe.
Do iss en Audio Klip: En wichdiger Deitscher- Aadeel 4!
PA Dutch 101 
Guder Dag Doug
Dein Aadeel fand ich fer interessant. Ich bin in Bryn Mawr (vun Philadelphia nita weit weg) geborn un uffgewachsen und do kenne ich annere Leit die aa Althouse heissen. Nachdem ich dein Aadeel gelese hab, nadedierlich hab i mi gefragt, ob selle Leit meeglicherweise mit’m Monroe verwandt sinn.
Bis schpeeder,
Jack
Jack,
Gross Dank fer dei Poscht. Ya, ich kenn Bryn Mawr zimmlich gut. Was hen selle Leit gsaat, die du gfroogt hoscht? Ich kenn aa annere Leit mit Althouse as en Naame. Ich finn selle Naame luschdig. ‘Sis en Misching vun Deitsch un Englisch. Alt + House. Ich froog mich fer was ‘sis net Althaus gebliwwe iss. Odder fer was es nett Oldhouse iss. Was denkscht du vun sell?
-Der Doug